Toshkent shahridagi Panarams Tashkent mehmonxonasida 27-aprel kuni gibrid formatdagi Ikkinchi Inklyuziv biznes-forum o‘tkaziladi.
Forum Zoom va YouTube platformasida rasmiy sahifa orqali jonli translyatsiya qilinadi. Forumning asosiy tili o‘zbek tili bo‘lib, rus, ingliz va o‘zbek imo-ishora tiliga sinxron tarjima qilinadi. Forumning maqsadi:
- inklyuziv ish bilan ta’minlashning muvaffaqiyatli holatlarini taqdim etish orqali ish beruvchilarning nogironligi bo'lgan arizachilarga nisbatan qarashlarini o‘zgartirish;
- nogironlarni ish bilan ta’minlashdagi muammoli masalalarni yuridik bo‘lim va kadrlar bo‘limi bilan muhokama qilish;
- inklyuziv ish beruvchilar uchun davlat tomonidan taqdim etilayotgan subsidiyalar va imtiyozlar haqida xususiy sektorning xabardorligini oshirish;
- mahalliy media platformalari orqali aholining inklyuziv bandlik haqida xabardorligini oshirish;
- xususiy sektordagi ish beruvchilar, nogironligi bo‘lgan shaxslar tashkilotlari bilan o‘tkazilgan muhokamalar asosida tahliliy eslatma ishlab chiqiladi va Kambag‘allikni qisqartirish va bandlik vazirligiga taqdim etiladi.
Forumda ishtirok etishga taklif qilinadi:
- Turli shakldagi nogironligi bo’lgan shaxslarni ish bilan ta’minlashdan manfaatdor bo‘lgan yirik, o‘rta va kichik biznes vakillari;
- Mehnat bozorida nogironligi sababli diskriminatsiyaga uchragan va ayni damda ish qidirayotgan nogironligi bor shaxslar;
- Mahalliy va xorijiy ommaviy axborot vositalari, shuningdek, inklyuziv bandlik va O‘zbekistonda nogironligi bo’lgan shaxslarni ish bilan ta’minlash muammolari bilan bog‘liq masalalarni yoritishni istovchi blogerlar.
Forumda ishtirok etish shartlari: Forumda ishtirok etish bepul, oflayn rejimda ishtirok etish uchun joylar soni cheklangan (yuztadan ko‘p bo‘lmagan). Tadbirda oflayn va onlayn ishtirok etish uchun oldindan ro‘yxatdan o‘tish talab qilinadi.
Tadbir kuni “Sharoit plus” hamda forum hamkorlarining ijtimoiy tarmoqlari va tashkilotning YouTube kanalida jonli efir o‘tkazilishi rejalashtirilgan.
Forum tashkilotchisi: Kambag‘allikni qisqartirish va bandlikka ko‘maklashish vazirligining ijtimoiy buyurtmasi doirasida Toshkent shahar “Sharoit plus” nogironlar jamoat birlashmasi.
Izoh (0)