Favqulodda vaziyatlar vazirligi Navoiy viloyati Karmana tumanida joylashgan qurilish mollari do‘konida sodir bo‘lgan yong‘in bo‘yicha ma’lumot berdi.
Qayd etilishicha, 10-aprelga o‘tar kechasi Karmana tuman FVB dispechirlik xizmatiga soat 23:03 da tumanning Islom Karimov ko‘chasida joylashgan 3 qavatli qurilish mollari savdo markazida yong‘in to‘g‘risidagi xabar kelib tushgan.
Xabarga ko‘ra, FVBdan 14 ta yong‘in-qutqaruv ekipaji jalb qilinib, voqea joyiga zudlik bilan yetib borgan. Favqulodda vaziyatlar bo‘limi xodimlari 800 kvadrat metrga ega bo‘lgan savdo do‘konidagi yong‘inni soat 01:59 da bartaraf etgan. Tan jarohati olganlar va halok bo‘lganlar to‘g‘risida ma‘lumot kelib tushmagan.
Mart oxirlarida Toshkentning Shayxontohur tumanida plastmassa mahsulotlarini saqlash omborida yong‘in yuz bergani ma’lum qilingandi. Shuningdek, Andijondagi ko‘p qavatli uyda yong‘in chiqqani, Xorazmdagi paxta zavodida yong‘in sodir bo‘lgani to‘g‘risida xabar berilgandi.
Izoh (0)