Toshkent viloyati hokimi Zoir Mirzayev fuqarolar uchun navbatdagi qabulida 18 yoshli nabirasiga kompyuter so‘rab kelgan otaxon murojaatini tinglab, “Xalq banki”ning viloyat filiali rahbariga ramazonda savob uchun IT mutaxassisiga yordam berishini tayinladi. Bu haqda hokim qabulida ishtirok etgan “Daryo” muxbiri xabar berdi.
Maʼlum bo‘lishicha, Toshkent viloyati hokimining fuqarolar uchun navbatdagi qabuli O‘rta Chirchiq tumanida bo‘lib o‘tgan.
Qabulda hokimga murojaat qilib kelgan otaxon nabirasi kompyuter mutaxassisligi bo‘yicha o‘qishni tamomlaganini aytib, unga kompyuter zarurligini, nafaqasi katta nabirasining o‘qishidan ortmayotganini aytib, viloyat hokimidan ko‘mak so‘radi.
“Qabulda fuqarolarga, yordam so‘rab keluvchilarga biror nima atab kelganmisan? Otaxonning 18 yoshli qiz nabirasi bor ekan. IT’dan sertifikati ham bor ekan. Bitta yaxshi noutbuk olib bering, ramazon oyida savob bo‘lsin”, — dedi “Xalq banki”ning viloyat filiali rahbariga topshiriq bergan hokim.
Eslatib o‘tamiz, avvalroq Zoir Mirzayev qabuliga yordam so‘rab kelgan 70 yoshdan oshgan otaxonning dardini tinglab, bolalari qarovsiz qoldirgan otaxonni saxovat uyiga joylashtirishda ko‘mak berishini aytib, “Bu hammamiz uchun isnod, ramazonda bunaqa holatlarga duch kelish uyat”, degandi.
Izoh (0)