Andijon viloyati Baliqchi tumanida yo‘l chetiga qo‘yib ketilgan Nexia rusumli avtomashina yonib ketdi. Bu haqda viloyat ichki ishlar boshqarmasi axborot xizmati xabar qilmoqda.
Taʼkidlanishicha, mazkur holat 9-aprel kuni soat 16:10 lar atrofida Baliqchi tumani, Chinobod shaharchasida sodir bo‘lgan.
Maʼlum qilinishicha, tumanning “O‘lmas” mahallasida yashovchi fuqaro J.T. Nexia-1 rusumli avtomashinasini Chinobod shahridagi yo‘l chetiga to‘xtatib, ovqatlanish shahobchasiga kirib ketgan vaqtida avtomashina dvigatelidagi elektr uzatgichlarda qisqa tutashuv kelib chiqqan. Oqibatda avtomobilning old qismida yong‘in sodir bo‘lgan.
Yong‘in tuman favqulodda vaziyatlar bo‘limi xodimlari tomonidan bartaraf etilgan. Yong‘in oqibatida tan jarohati olgan fuqarolar yo‘q.
Hozirda mazkur holat yuzasidan Baliqchi tumani FVB tomonidan surishtiruv ishlari olib borilmoqda.
