O‘zbekistonda 2023-yilning o‘tgan uch oyi davomida tez yordam xizmatiga 3 milliondan ortiq chaqiriq kelib tushgan. Bu haqda Respublika tez tibbiy yordam markaziga tayanib, SSV matbuot xizmati xabar berdi.
Respublika tez tibbiy yordam markazi direktori Abduvoitjon Gafurovning so‘zlariga ko‘ra, yanvar—mart oylarida tez yordamga mamlakat bo‘yicha jami 3 million 90 ming 479 ta chaqiriq kelib tushgan. Bemorlardan 276 ming 566 nafari shifoxonalarga gospitalizatsiya qilingan.
Eng ko‘p murojaatlar:
- Farg‘ona viloyatida — 359 795 ta;
- Andijon viloyatida — 315 941 ta;
- Toshkent shahrida — 307 994 ta;
- Toshkent viloyatida — 294 037 ta;
- Namangan viloyatida — 283 665 ta qayd etilgan.
Maʼlumot uchun, 2022-yil davomida tez tibbiy yordam xizmatiga jami 13 million 22 ming 162 ta chaqiriq kelib tushgan.
Avvalroq Toshkent shahar Bektemir tumanida tez yordam mashinasida olib ketilayotgan ayol tibbiyot xodimlariga qarshilik ko‘rsatib, salondagi jihozlarni tepib sindirgani to‘g‘risida xabar berilgandi. Keyinroq ayol spirtli ichimlik ta’sirida bo‘lgani ma’lum qilingan edi. Kuni kecha Yunusobod tez tibbiy yordam podstansiyasi feldsheri Zlata Gafurova chaqiriq bo‘yicha erkak shifokorlar brigadasini yuborgani uchun bemorning o‘g‘li tomonidan tahdidga uchrayotgani ma’lum bo‘ldi.
2022-yil oktabr ma’lumotlariga ko‘ra, O‘zbekistonda tez yordam xizmatida faoliyat yuritayotgan shifokorlar soni qariyb 13 ming 800 nafarga yetgan. Shuningdek, tizimda mehnat qilayotgan o‘rta tibbiyot xodimlari soni 29 ming 156 nafarni tashkil qilmoqda.
Izoh (0)