Buxoroda 38 yoshli erkak tomorqasiga tushgan eshakning quloqlarini kesib tashladi

Buxoro viloyati IIB ijtimoiy tarmoqlarda tarqalgan eshakning quloqlari kesib olingani tasvirlangan video yuzasidan ma’lumot berdi.

Maʼlum bo‘lishicha, 6-aprel kuni soat 16:00 da Peshku tumanida yashovchi 38 yoshli U.A. qo‘shnisi fuqaro J.X.ga tegishli eshak tomorqa yeriga zarar yetkazgani bahonasida jonivorning ikki qulog‘ini kesgan. Oradan vaqt o‘tib, eshak ko‘p qon yo‘qotishi oqibatida nobud bo‘lgan. 

Hozirda fuqaro U.A.ga nisbatan Ma’muriy javobgarlik to‘g‘risidagi kodeksning 111-moddasi (hayvonlarga nisbatan shafqatsiz munosabatda bo‘lish) 2-qismida ko‘rsatilgan huquqbuzarlikni sodir etgani bo‘yicha to‘plangan hujjatlar maʼmuriy tartibda chora ko‘rish uchun Jinoyat ishlari bo‘yicha Peshku tumani sudiga yuborilgan.

Bundan oldin Navoiyda noma’lum shaxslar itni Damas’ga bog‘lab, shahar bo‘ylab sudragani, Toshkent viloyatida itlarni so‘yib kelgan fuqaro 10 sutkaga qamalgani, shuningdek, “Ippodrom”da ikki bosh ot ochlikdan nobud bo‘lishiga sababchi bo‘lganlar javobgarlikka tortilgani to‘g‘risida xabar berilgandi.