Ўзбекистонда 2023 йилнинг ўтган уч ойи давомида тез ёрдам хизматига 3 миллиондан ортиқ чақириқ келиб тушган. Бу ҳақда Республика тез тиббий ёрдам марказига таяниб, ССВ матбуот хизмати хабар берди.
Республика тез тиббий ёрдам маркази директори Абдувоитжон Гафуровнинг сўзларига кўра, январь—март ойларида тез ёрдамга мамлакат бўйича жами 3 миллион 90 минг 479 та чақириқ келиб тушган. Беморлардан 276 минг 566 нафари шифохоналарга госпитализация қилинган.
Энг кўп мурожаатлар:
- Фарғона вилоятида — 359 795 та;
- Андижон вилоятида — 315 941 та;
- Тошкент шаҳрида — 307 994 та;
- Тошкент вилоятида — 294 037 та;
- Наманган вилоятида — 283 665 та қайд этилган.
Маълумот учун, 2022 йил давомида тез тиббий ёрдам хизматига жами 13 миллион 22 минг 162 та чақириқ келиб тушган.
Аввалроқ Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. Кейинроқ аёл спиртли ичимлик таъсирида бўлгани маълум қилинган эди. Куни кеча Юнусобод тез тиббий ёрдам подстанцияси фелдшери Злата Гафурова чақириқ бўйича эркак шифокорлар бригадасини юборгани учун беморнинг ўғли томонидан таҳдидга учраётгани маълум бўлди.
2022 йил октябрь маълумотларига кўра, Ўзбекистонда тез ёрдам хизматида фаолият юритаётган шифокорлар сони қарийб 13 минг 800 нафарга етган. Шунингдек, тизимда меҳнат қилаётган ўрта тиббиёт ходимлари сони 29 минг 156 нафарни ташкил қилмоқда.
Изоҳ (0)