Toshkentning Yunusobod tez tibbiy yordam podstansiyasi feldsheri Zlata Gafurova chaqiriq bo‘yicha erkak shifokorlar brigadasini yuborgani uchun bemorning o‘g‘li tomonidan tahdidga uchrayotganini ma’lum qildi. Bu haqda u o‘zining Facebook’dagi sahifasiga yozib qoldirgan.
Zlata Gafurovaning bloger Islam Kaparzoga bildirishicha, podstansiyada undan dispetcher o‘rnini egallab turishni so‘rashgan. Navbatchilik vaqtida bo‘lgan qo‘ng‘iroqda erkak kishi onasining yuragi og‘irlashib qolgani, biroq unga tibbiy yordam ko‘rsatish uchun ayol shifokorlar jo‘natilishini talab qilgan.
O‘sha vaqtda bo‘sh ayol shifokorlar brigadasi ham bo‘lmagan. Gafurova bu haqda qo‘ng‘iroq qilgan fuqaroni ogohlatirgan va erkakning roziligini olgan.
Biroq voqea joyiga erkak shifokorlar brigadasi yetib kelganida, qo‘ng‘iroq qilgan shaxs ularni uyga kiritmay, elektrokardiografiya apparatini olib qolmoqchi bo‘lgan. Ularning yonida, feldsherning so‘zlariga ko‘ra, unga ham qo‘ng‘iroq qilib, odobsiz so‘zlar bilan haqorat qila boshlagan.
Keyinroq bemorga ayol shifokor bo‘lgan boshqa bir guruh yetib kelgan. Shifokorlar hayot uchun xavfli holatni aniqlamagan va kasalxonaga yotqizish shart emas degan xulosa bergan. Zlata Gafurova birinchi tez yordam mashinasi 17 daqiqada yetib borgani, ikkinchisi uchun esa bir soatdan ko‘proq vaqt ketganini taʼkidlaydi.
“Bir safar yurakdagi og‘riq sabab bo‘lgan murojaatda ham ayollar brigadasi kelishini so‘rashgandi, ular yetib borguncha — o‘lim. Mana, endi o‘ylab ko‘r. Bundan keyin erkak shifokorlarni nima qilish kerak?”, — deb yozadi feldsher.
Zlata Gafurovaning so‘zlariga ko‘ra, tungi soat birlarda ichki ishlar organlari xodimlari podstansiyaga qo‘ng‘iroq qilgan va ular ustidan shikoyat kelib tushganini, yaʼni dispetcher “noto‘g‘ri tez yordam brigadasini” yuborganini aytgan. Undan GOMga (shahar IIB bo‘limi) kelishni so‘rashgan. Qiz tahdid va haqoratlar haqida qarshi ariza yozgan.
Oradan bir necha kun o‘tib Zlata Gafurovaning oldiga kvartal uchastka noziri qo‘ng‘iroq qiladi. U nima bo‘lganini aytib berishni so‘ragan va so‘ngra unga qarshi arizani qaytarib olishni maslahat bergan, aks holda feldsher 12 million so‘m miqdorida jarimaga tortilishini aytgan. Qaysi xatti-harakatlari uchun jarima to‘lashi kerakligi so‘ralganda, tuman IIB xodimi javob bermagan.
Ko‘p o‘tmay uchastka nozirining oldiga tez yordam chaqirgan erkak ham yetib kelgan. Feldsherning so‘zlariga ko‘ra, u o‘sha yerda ham: “Hamma joyda tanish-bilishlarim bor — butun umrga ishingdan uchib ketasan”, — deya tahdid qilgan.
Avvalroq Toshkent shahar Bektemir tumanida tez yordam mashinasida olib ketilayotgan ayol tibbiyot xodimlariga qarshilik ko‘rsatib, salondagi jihozlarni tepib sindirgani to‘g‘risida xabar berilgandi. Keyinroq ayol spirtli ichimlik ta’sirida bo‘lgani ma’lum qilingan edi.
Izoh (0)