O‘zbekistonda tez yordam xizmatida faoliyat yuritayotgan shifokorlar soni qariyb 13 ming 800 nafarga yetdi. Bu haqda Sog‘liqni saqlash vazirligi matbuot xizmati xabar berdi.
Ochig‘ini aytish kerak, avvallari yurtimizda tez tibbiy yordam ko‘rsatish sifatidan ko‘pchilikning ko‘ngli to‘lmas, qolaversa, tizimdagi shifokor kadrlar malakasi borasida ham qator muammolar mavjud edi. Shu bois keyingi yillarda sohani yetuk va tajribali mutaxassislar bilan ta’minlash, ularni qayta tayyorlash hamda kasbiy ko‘nikmalarini oshirishga alohida e’tibor qaratilyapti, — deydi Respublika tez tibbiy yordam markazining tez tibbiy yordam xizmatini muvofiqlashtiruvchi dispetcherlik markazi rahbari Davlat Yuldashev.Natijada 2022-yilning o‘tgan 9 oyi davomida tez yordamda faoliyat yuritayotgan shifokorlar soni 13 ming 798 nafarni tashkil etib, ta’minlanganlik darajasi 90,7 foizga yetdi. Bu boradagi ko‘rsatkich Buxoro va Namangan viloyatlarida 100 foiz, Samarqandda 99 foiz, Andijonda 95,2 foizni tashkil qilmoqda.
Ma’lumki, 103 xizmatida reanimatolog-shifokorlar alohida o‘ringa ega bo‘lib, ayni paytda sohada 686 nafar ana shunday mutaxassislar faoliyat olib bormoqda. Bu borada eng yaxshi ko‘rsatkich Samarqand, Buxoro va Xorazm viloyatlari hissasiga to‘g‘ri kelib, mazkur hududlarda 103 xizmati to‘liq reanimatolog-shifokorlar bilan ta’minlangan.
Shuningdek, 2022-yilning ayni shu davrida tizimda mehnat qilayotgan o‘rta tibbiyot xodimlari soni 29 ming 156 nafarni tashkil qilmoqda.
Izoh (0)