Farg‘ona viloyati O‘zbekiston tumanida 68 yoshli erkak o‘z o‘g‘lini sakkiz marotaba pichoqlab, o‘ldirdi. Bu haqda Ichki ishlar vazirligi axborot xizmati xabar berdi.
Xabarga ko‘ra, holat Farg‘ona viloyati O‘zbekiston tumanidagi “Qoratepa” mahallasi Yangihayot ko‘chasida sodir bo‘lgan. Ushbu mahallada yashovchi 68 yoshli erkak hodisa sodir bo‘lgan kuni o‘z farzandi bilan spirtli ichimlik ichib o‘tirgan bo‘lgan. Shu vaqt ular o‘rtasida janjal kelib chiqqan.
Erkak oshxona pichog‘i bilan o‘g‘lini 8 marotaba pichoqlagan. Marhum E.M. bir necha yillar mobaynida Rossiyada ishlab kelib, aynan o‘sha hududlarda ham og‘ir jinoyatlarni sodir etib, ozodlikdan mahrum etish jazosini o‘tab kelgan. U uyiga qaytgach ham oilasida nosog‘lom muhitni yaratib kelgan: bir necha bor ota-onasi bilan janjallashgan.
Mazkur holat jinoyat ishlari bo‘yicha O‘zbekiston tuman sudida ko‘rilib, sudlanuvchiga nisbatan 10 yil muddatga ozodlikdan mahrum qilish jazosi tayinlangan. Biroq erkak jazoni yengillashtirishni so‘rab, sudga appelyatsiya shikoyatini kiritgan. Shikoyat mazmunan ko‘rib chiqilgan. Sud ish hujjatlari o‘rganib chiqilganidan so‘ng sud hukmi to‘g‘ri va adolatli chiqarilgani inobatga olingan holda hukm o‘zgarishsiz qoldirildi.
Izoh (0)