O‘zbekistonda 2026-yilda markazlashgan ichimlik suvi bilan taʼminlanganlik 90 foizga, oqova suv xizmati bilan qamrab olinganlik darajasi 35 foizga yetkaziladi.
Xabarga ko‘ra, AOKAda o‘tkazilgan brifingda “O‘zsuvtaʼminot”AJ axborot xizmati rahbari Akmal Murodov aholini ichimlik suvi bilan taʼminlash yo‘nalishida amalga oshirilgan asosiy ishlar haqida maʼlumot berdi. So‘nggi 6 yilda aholining ichimlik suvi taʼminotini yaxshilashga 10 trillion so‘mga yaqin mablag‘ yo‘naltirildi. Ushbu mablag‘lar hisobidan 1 176 ta suv inshooti va 20,8 ming km ichimlik suvi tarmoqlari tortildi. Natijada respublika aholisining markazlashgan ichimlik suvi bilan taʼminlanganlik darajasi 2017-yilda 63,9 foizni tashkil etgan bo‘lsa, bugunga kelib ushbu ko‘rsatkich 74,4 foizga yetkazildi. Ushbu davr mobaynida 8,2 million nafar aholi ilk bor markazlashgan ichimlik suvi bilan taʼminlandi, 4,8 million nafar aholining esa ichimlik suvi taʼminoti yaxshilandi.
Hozirda “Katta to‘rtlik” turkumiga kiruvchi Ernst and Young Advisory kompaniyasi bilan birgalikda aksiyadorlik jamiyati faoliyatini transformatsiya qilish bo‘yicha 10 ta asosiy yo‘nalish belgilanib, bu borada ishlar olib borilmoqda.
Yangi O‘zbekistonning taraqqiyot strategiyasiga muvofiq 2026-yilga kelib, respublika aholisining markazlashgan ichimlik suvi bilan taʼminlanganlik darajasini 90 foizga, oqova suv xizmatlari bilan qamrab olinganlik darajasini esa 35 foizga yetkazish rejalashtirilgan. Bu ishlar uchun 40 trillion so‘m investitsiya jalb qilish ko‘zda tutilgan.
Izoh (0)