Andijon shahrida yashovchi fuqaro uch nafar farzandini moddiy taʼminlashdan bo‘yini tovlagani uchun sud hukmi bilan 10 oy muddatga ozodlikdan mahrum etildi. Bu haqda “Daryo”ga MIB viloyat boshqarmasi axborot xizmati xabar bermoqda.
Taʼkidlanishicha, Fuqarolik ishlari bo‘yicha Andijon tumanlararo sudining 2019-yil 25-oktabrdagi sud buyrug‘iga asosan qarzdor A.U.dan undiruvchi D.U.ning foydasiga uch nafar farzandining moddiy taʼminoti uchun 1/2 qism miqdorida aliment undirilishi belgilangan.
Biroq, 2021-yil 9-dekabr kuni Majburiy ijro byurosi Andijon shahar bo‘limi xodimlari tomonidan A.U. ustidan aliment pullarini to‘lashdan bo‘yin tovlaganligi sababli jinoyat ishlari bo‘yicha shahar sudiga taqdimnoma kiritilgan. Taqdimnomaga ko‘ra unga nisbatan Maʼmuriy javobgarlik to‘g‘risidagi kodeksning 47-4-moddasiga (voyaga yetmagan yoki mehnatga layoqatsiz shaxslarni moddiy taʼminlashdan bo‘yin tovlash) asosan 15 kunlik maʼmuriy qamoq jazosi tayinlangan.
Ammo A.U. bundan to‘g‘ri xulosa chiqarmasdan, belgilangan jazoni o‘tab bo‘lgandan so‘ng ham alimentdan bo‘lgan qarzdorligini to‘lamay kelgan. Natijada uning alimentdan bo‘lgan jami qarzi 19,4 million so‘mga yetgan.
Holat yuzasidan A.U.ga nisbatan jinoyat ishi qo‘zg‘atilib, mazkur ish Jinoyat ishlari bo‘yicha Andijon shahar sudi tomonidan tegishli tartibda ko‘rib chiqilgan. Sud hukmi bilan u Jinoyat kodeksi 122-moddasining 1-qismiga asosan aybli deb topilib, unga nisbatan 10 oy muddatga ozodlikdan mahrum qilish jazosi tayinlangan.
Izoh (0)