O‘zbekistonda ayollar va bolalarga zo‘ravonlik qilganlik uchun qatʼiy javobgarlik belgilanmoqda.
Senatning 39-yalpi majlisida ayollar va bolalarni zo‘ravonlikdan himoya qilish haqidagi qonun loyihasi ko‘rib chiqildi va maʼqullandi. Yig‘ilishda Senat raisi Tanzila Norboyeva mazkur hujjatning ahamiyati haqida fikr bildirdi.
“Qonunlarning qatʼiylashayotgani, javobgarlikning kuchaytirilayotgani yaxshi, lekin bu jamiyatimizda ayollar va bolalar huquqlarini himoya qilish, voyaga yetmaganlarga nisbatan zo‘ravonlikning oldini olish uchun zarur bo‘lgan oxirgi vosita emas. Bu normalar odamlarning tafakkuri va xotirasi bilan birga yuragidan ham joy olishi kerak. Butun jamiyat faol bo‘lishi kerak. Dunyoqarash o‘zgarishi zarur. Insonga nisbatan zo‘ravonlik qilish og‘ir jinoyat ekanligi odamlarning ongiga chuqur o‘rnashsagina natija kutilganidek bo‘ladi. Bu endi birgina huquqni muhofaza qiluvchi organlar yoki taʼlim-tarbiyaga masʼul tuzilmalarninggina ishi emas, balki barchamizning vazifamizga aylanishi zarur”, –– dedi Senat rasmiysi.
Tanzila Norboyevaning taʼkidlashicha, 2021-2022-yillarda huquqni muhofaza qiluvchi organlarga ayollar va qizlarga nisbatan tazyiq va zo‘ravonlik holatlari yuzasidan 72 mingdan ziyod murojaat kelib tushgan.
“Oilaviy (maishiy) zo‘ravonlik”, “taʼqib etish”, “shahvoniy shilqimlik qilish” kabi qonunchilik nuqtayi nazaridan yangi, lekin real kundalik hayotda allaqachon pishib yetilib, muammoga aylangan tushunchalar kiritilayotgani va bunday xatti-harakatlarga nisbatan qatʼiy javobgarlik belgilanayotgani juda muhim. Jinsiy zo‘ravonlik, jumladan, voyaga yetmaganlarga nisbatan jinsiy zo‘ravonlik sodir etganlarga qonunchilikda ko‘zda tutilgan yengilliklar bermasligi, jazoni o‘tashdan muddatidan ilgari shartli ozod qilish yoki jazoni yengilrog‘i bilan almashtirish kabi choralar qo‘llanmasligi qatʼiy belgilab qo‘yilmoqda. Bu borada amaldagi normalardagi turli “tuynuklar” yopilmoqda”, –– degan Senat rasmiysi.
Izoh (0)