“Tolibon” harakatiga qurollarini ro‘yxatdan o‘tkazish uchun bir oy muhlat berildi. Qaror “Tolibon” tomonidan o‘z safida reviziya olib borish uchun e’lon qilindi. Bu haqda Sputnik Afg‘oniston xabar berdi.
Afg‘oniston ichki ishlar vazirligi qarorni amalga oshirish uchun bir oy muhlat bergan.
“Bu o‘z vakolatlarini suiiste’mol qilib, talonchilik bilan shug‘ullanuvchi shaxslarni aniqlash uchun zarur”, — deyiladi vazirlik bayonotida.
Vazirlikning qayd etishicha, endilikda “Tolibon”ning fuqarolik yoki harbiy xizmatda ro‘yxatdan o‘tgan shaxslar qurol-yarog‘ ruxsatnomasini bir oy muddatda yangilashi shart.
“Tolibon” armiyasi bosh shtabi boshlig‘i Afg‘oniston Qurolli kuchlari soni 200 ming kishiga yetkazilishini ma’lum qilgandi. Jumladan, 2024-yil armiyadagi harbiy xizmatchilar sonini 150 mingdan 170 mingga oshirish va uni asta-sekin 200 mingga yetkazish rejalashtirilgan.
2021-yil avgust oyi o‘rtalarida “Tolibon” Afg‘onistonda hokimiyatni qo‘lga kiritgan paytda ularning qo‘l ostidagi jangchilar soni 100 ming kishini tashkil qilgandi. 2022-yil fevral oyida “Tolibon” vakillari o‘z Qurolli kuchlari sonini 150 ming kishiga yetkazish niyatida ekanini bildirgan.
Izoh (0)