“Толибон” ҳаракатига қуролларини рўйхатдан ўтказиш учун бир ой муҳлат берилди. Қарор “Толибон” томонидан ўз сафида ревизия олиб бориш учун эълон қилинди. Бу ҳақда Sputnik Афғонистон хабар берди.
Афғонистон ички ишлар вазирлиги қарорни амалга ошириш учун бир ой муҳлат берган.
“Бу ўз ваколатларини суиистеъмол қилиб, талончилик билан шуғулланувчи шахсларни аниқлаш учун зарур”, — дейилади вазирлик баёнотида.
Вазирликнинг қайд этишича, эндиликда “Толибон”нинг фуқаролик ёки ҳарбий хизматда рўйхатдан ўтган шахслар қурол-яроғ рухсатномасини бир ой муддатда янгилаши шарт.
“Толибон” армияси бош штаби бошлиғи Афғонистон Қуролли кучлари сони 200 минг кишига етказилишини маълум қилганди. Жумладан, 2024 йил армиядаги ҳарбий хизматчилар сонини 150 мингдан 170 мингга ошириш ва уни аста-секин 200 мингга етказиш режалаштирилган.
2021 йил август ойи ўрталарида “Толибон” Афғонистонда ҳокимиятни қўлга киритган пайтда уларнинг қўл остидаги жангчилар сони 100 минг кишини ташкил қилганди. 2022 йил февраль ойида “Толибон” вакиллари ўз Қуролли кучлари сонини 150 минг кишига етказиш ниятида эканини билдирган.
Изоҳ (0)