Aleksey Navalniyning maslakdoshlari Sochidagi Krasnaya Polyana shaharchasida joylashgan Rossiya prezidentining maxfiy qarorgohi atrofida “Pantsir-S1” zenit-raketa va qurol tizimi o‘rnatilganini aniqladi.
Xuddi shunday havo hujumidan mudofaa moslamalari yanvar oyida Vladimir Putinning Novo-Ogaryovo va Valdaydagi rasmiy qarorgohlari yaqinida paydo bo‘lgandi.
Putinning Krasnaya Polyanadagi yashirin qarorgohi haqida 2014-yilda jurnalist va bloger Andrey Malgin gapirgan edi. Shuningdek, bloger u yerdan bir necha kilometr uzoqlikda joylashgan va Dmitriy Medvedevga tegishli ekani taxmin qilingan turar joy suratini ko‘rsatgan edi.
Bino egasi “Gazprom” hioblanadi. Rasmiy ravishda u “Achipse” rasmiy mehmonlar uyi deb ataladi. 20 gektar maydonda bir nechta binolar, jumladan, umumiy maydoni 3 800 kvadrat metr bo‘lgan uy bor, uning yer ostida ikkita, yer ustida ikkita qavati, shuningdek, vertolyot maydonchasi va o‘z lifti mavjud.
Rasmiy ravishda Rossiya prezidentining Kremlni hisobga olmaganda uchta rezidensiyasi bor, bular Moskva viloyatidagi Novo-Ogaryovo, Sochidagi Bocharov Ruchey, Novgorod viloyatidagi Valday. Surishtiruvchi jurnalistlarning fikricha, Putin o‘z atrofidagi tadbirkorlar va ularga aloqador kompaniyalarga tegishli qarorgohlardan ham foydalanishi mumkin.
Izoh (0)