Chernogoriyadagi prezidentlik saylovlarida berilgan ovozlarni sanab chiqish natijalariga ko‘ra, yevropaparast iqtisodchi, “Europe Now” harakatidan nomzod Yakov Milatovich g‘alaba qozondi — uni saylovchilarning 60 foizi qo‘llab-quvvatlagan. Bu haqda 3-aprel, dushanbaga o‘tar kechasi saylov jarayonini kuzatuvchi Monitoring markazi ma’lum qildi.
Saylovda mag‘lub bo‘lgan davlat rahbari Milo Jukanovich 1991-yildan beri mamlakat bosh vaziri lavozimida besh marta ishlagan, ikki marta — 1998-yildan 2002-yilgacha va 2018-yildan hozirgacha prezident bo‘lgan. Ikkinchi raund yakunida u mag‘lubiyatini tan oldi va raqibini tabrikladi. Jukanovich 21-mayga qadar prezidentlik faoliyatini davom ettiradi.
Yangi prezident mamlakatni Yevropa Ittifoqiga olib kirishga va’da berdi
“Chernogoriya o‘z tanlovini qildi. Men bu tanlovni hurmat qilaman va unga muvaffaqiyatli prezident bo‘lishini tilayman. Shunda Chernogoriya ham muvaffaqiyatli bo‘ladi”, — dedi Jukanovich.
Milatovich 2020-yilning dekabridan 2022-yilning apreligacha iqtisodiyot va iqtisodiy rivojlanish vaziri lavozimida ishlagan. O‘tgan yili u “Europe Now” partiyasiga asos solgan. G‘alabadan so‘ng o‘z tarafdorlari oldida so‘zga chiqqan Milatovich Chernogoriya kelasi besh yil ichida Yevropa Ittifoqiga qo‘shilishini va’da qildi. Mamlakat 2008-yilda Yevropa Ittifoqiga nomzod maqomini olgandi.
“Chernogoriya oldinga qat’iy qadam tashladi va eskirgan Milo Jukanovich rejimi bilan xayrlashdi. Mamlakat Yevropa, yanada go‘zal va adolatli Chernogoriya tomon bir qadam tashladi”, — dedi Milatovich.
Shu bilan birga, serbiyaparast lager tomonidan qo‘llab-quvvatlangan Yakov Milatovich Belgrad bilan ham aloqalarni mustahkamlashga ham va’da beradi.
Izoh (0)