“Tolibon” o‘z armiyasidagi harbiylar sonini 150 ming kishiga yetkazishga qaror qildi

Afg‘onistonda 2021-yilning avgustida hokimiyat tepasiga kelgan “Tolibon” harakati o‘z armiyasini 150 ming kishiga yetkazmoqchi. Bu haqda toliblar mudofaa vazirining matbuot kotibi Inoyatullo Xorazmiy Bakhtar axborot agentligiga bergan intervyusida ma’lum qildi.

Unga ko‘ra, yangi qurolli kuchlarni shakllantirishda Mudofaa vazirligi jangovar tajribaga ega, jumladan, avvalgi hukumat davrida xizmat qilgan harbiy xizmatchilarni safarbar qilishni rejalashtirmoqda. “Bunday tuzilmani yaratish uchun professional kadrlar kerak va milliy Mudofaa vazirligi yangi armiyaga jangovar tajribaga ega ofitserlarni jalb qiladi”, — deydi Xorazmiy.

Mudofaa vazirligi vakili bo‘lajak armiyaning texnik jihozlanishi haqida gapirar ekan, “Tolibon” “qator qo‘shni davlatlar bilan” harbiy texnika yetkazib berish bo‘yicha muzokaralar olib borayotganini ta’kidlagan.

Avvalroq “Tolibon” mamlakat armiyasi 100 ming kishilik bo‘lishini ma’lum qilgandi. Agarda “Tolibon” qurolli kuchlari 150 ming kishiga yetkazilsa, u Markaziy Osiyo respublikalari orasida eng ko‘p sonli armiyaga aylanadi.

Global Firepower ma’lumotlariga ko‘ra, O‘zbekistonda harbiy xizmatchilarning umumiy soni 65 ming nafarni (Jahon bankining 2018 yildagi ma’lumotlariga ko‘ra — 68 ming nafar) tashkil etadi. Solishtirish uchun: Qozog‘istonda — 77 ming, Qirg‘izistonda — 22 ming, Tojikistonda — 15 ming harbiy xizmatchi mavjud.

Xorazmiy, shuningdek, o‘z intervyusida harbiylarning axloqiy holatini nazorat qiluvchi Tozalash komissiya hozirga qadar “Tolibon”ning 4202 nafar vakilini harakat safidan chiqarganini ma’lum qilgan.

Tozalash komissiyasi “Tolibon” tomonidan 2021-yilning noyabrida tuzilgan. Harakat shu tariqa afg‘onistonliklarning “Tolibon” jangarilarining repressiyalari va o‘zboshimchaliklari haqidagi ko‘plab shikoyat va xabarlariga javob qaytargan. Ushbu komissiya harakatning marhum asoschisi mulla Umarning o‘g‘li mulla Muhammad Yoqub boshchiligidagi “Tolibon” Mudofaa vazirligiga bo‘ysunadi. Uning asosiy vazifasi safda o‘z harakatlari bilan toliblarni “yomonotliq qilayotgan” shaxslarni aniqlashdan iborat.