Rossiya frontga eski sovet tanklarini yubormoqda. Bu jang maydonida ustunlik beradimi? (video)

Rossiya frontga 1940—1950-yillarda ishlab chiqarilgan T-54 va T-55 eski sovet tanklarini yubormoqda. Mazkur tanklarning jang maydonida qanday ahamiyatga egaligi bo‘yicha tushuntirish berildi.

Ijtimoiy tarmoqlarda Rossiya Ukrainadagi urushga sovet tanklari yuborayotgani aks etgan kadrlar e’lon qilindi. Harbiy ekspertlar zirhli transport vositalari 1946 va 1958-yillarda foydalanishga topshirilgan eski sovet T-54 va T-55 tanklari ekanini aniqladi. Ehtimol, ulardan hech qachon janglarda foydalanilmagan, ammo harbiy paradlar uchun ishlatilgan yoki muzeylarda saqlangan bo‘lishi mumkin.

BBC muxbiri Pavel Aksenovga ko‘ra, Rossiyaning eski zirhli transport vositalarini ombordan olib chiqib, urushga jo‘natishi birinchi holat emas. Ilgari T-55 ning modernizatsiyasi bo‘lgan T-62M tanklari frontda ko‘rinish bergan. Urushda Ukraina tomonida T-55 ning takomillashtirilgan versiyasi bo‘lgan Sloveniya M-55S tanki ham ishtirok etmoqda. Ukrainaga yetkazib berilishi kutilayotgan nemis Leopard-1 tanklari ham modernizatsiya qilinganiga qaramay, zamonaviylariga nisbatan juda eskirganini ta’kidlangan.

“Ukrainadagi urush hajm ahamiyatga ega bo‘lgan konfliktdir, shu uchun Rossiyada zo‘rg‘a o‘qitilgan askarlarni urushga safarbar qilish va 1950-yillardagi tanklarni frontga yuborish odatiy hol. Ushbu mantiqqa ko‘ra, tank har qanday holatda ham mustahkamlangan pozitsiyalarga hujum qilishda piyodalarni qo‘llab-quvvatlay oladi”, — deydi Aksenov.

U so‘nggi yarim asrda zamonaviy tanklarga qarshi kurash vositalar ilgarilab ketgani, eski tanklar osonlikcha nishonga olinishini qo‘shimcha qildi.

“T-55 qayta jihozlanishi, ularga dinamik himoya bloklarini o‘rnatilishi mumkin. Sababi tanklar ularsiz oddiy RPG-7 granatalardan yo‘q qilinishi mumkin”, — deydi u.

BBC muxbiri ammo 1960-yillardagi tanklarni 2020-yillarda jang maydonida jiddiy rol o‘ynashi mumkin bo‘lgan harbiy texnikaga aylantirishning iloji yo‘qligini ta’kidlamoqda.

“T-62 va M-55 asosiy versiyadan juda farq qiladi. Birinchi navbatda bu o‘q otish tizimiga aloqador. T-55 va T-54 bir paytlar 100 mm D-10T bilan qurollangan bo‘lib, ajoyib edi. Muammo shundaki, 1940-yillarda shunday bo‘lgan. T-62 ham, M-55 ham ancha yaxshi xususiyatlarga ega yangi o‘t ochuvchi tizimga ega bo‘ldi, bu ularni hech bo‘lmaganda zamonaviy tank qurollariga biroz yaqinlashtiradi.

T-54 va T-55 ni frontga yuborish maqsadlardan biri bu — harbiylarning ulardan foydalanish ancha qulay bo‘lishidir. T-72, T-80 va T-90 zamonaviy tanklaridan foydalanish murakkab bo‘lib, tankka o‘tirish, undan o‘q otishni o‘rganishga ko‘p vaqt ajrata olmaydigan odamlarga ularni topshirish qiyin”, — deydi u.

Aksenov shu sababli ushbu transport vositalarining ekipajlari professional bo‘lmasligi ehtimoli kattaligi, ular hatto eski tanklarning imkoniyatlaridan ham 100 foiz foydalana olmasligini bildirdi.