“10 ta tank nima bo‘ladi?” Qaysi davlatlar Ukrainani tanklar bilan ta’minlaydi?
AQSH va Germaniya Ukrainaga eng so‘nggi rusumdagi jangovar tanklarni, Abrams va Leopard, jo‘natishga va’da berdi. Bu bir qancha yevropalik ittifoqchilarning Kiyevga tank yetkazib berishiga yo‘l ochdi, deya xabar berdi Al Jazeera.
Prezident Jo Bayden va kansler Olaf Shols bayonotiga ko'ra, Vashington 31 ta Abrams tankini, Berlin esa 14 ta Leopard 2 tankini Ukrainaga yetkazib beradi. Mazkur qaror Buyuk Britaniya o‘tgan hafta 14 ta Challenger 2 tankini Kiyevga yetkazib berishga va’da berganidan keyin e’lon qilindi. Ukraina prezidenti Vladimir Zelenskiy Rossiya harbiylarini Ukraina hududidan siqib chiqarishda yordam berish uchun 300 ta tank so‘ragan. Rossiya tanklar yetkazilishiga munosabat bildirib, ular “yonib ketishini” ma’lum qilgan.
Hozirda quyidagi davlatlar Ukrainaga tanklar yetkazishga rozi bo‘ldi:
Germaniya
Ukraina va G‘arb rasmiylarining bir necha kunlik bosimidan so‘ng, Germaniya Ukrainaga Leopard 2 jangovar tanklarini yetkazib berishini e’lon qildi.
Kansler Sholsning ta’kidlashicha, Germaniya dastlab 14 ta tank jo‘natadi va boshqa mamlakatlarga Ukraina uchun Leopard 2 tanklarini eksport qilishga ruxsat beradi. Bu Yevropa bo‘ylab qo‘shimcha harbiy yordam uchun katta to‘siqni olib tashlaydi.
Maqsad Germaniya va uning ittifoqchilari Ukrainaga jami ikkita batalon yoki 88 ta tank berish ekani ta’kidlandi. Dunyo bo‘ylab 20 ga yaqin armiya tomonidan foydalaniladigan Leopard’lar Ukraina uchun eng yaxshi variant hisoblandi. Chunki ular mexanik jihatdan nisbatan kamroq murakkab bo‘lib, Ukraina kuchlarini undan tezroq foydalanishga o‘rgatishda yordam beradi.
Buyuk Britaniya
Britaniya yaqin haftalarda Ukrainaga o‘zining 14 ta Challenger 2 asosiy jangovar tanklarini, shuningdek, boshqa ilg‘or artilleriya texnikasini yuborishga va’da berdi.
Challenger 2 Britaniya armiyasida 1994-yildan beri xizmat qilmoqda. Armiya ma’lumotlariga ko‘ra, u Bosniya va Gersegovina, Kosovo va Iroqda joylashtirilgan. 30 yilga yaqin vaqt mobaynida Vickers Defense Systems kompaniyasi 500 ta Challenger 2 ishlab chiqargan.
Amerika Qo‘shma Shtatlari
AQSH avvalgi pozitsiyasini o‘zgartirdi va Ukrainaga o‘zining 31 ta M1 Abrams jangovar tankini yuborishini ma’lum qildi.
Bayden bu dunyodagi “eng qobiliyatli” tank ekanini aytib, Ukrainaga hududiy yaxlitligini himoya qilishda yordam berishini ta’kidladi. AQSH rahbari Ukrainaga tanklarni yetkazib berish “vaqt olishini” tan oldi, biroq Vashington bu vaqtda ukrainaliklar askarlarni undan foydalanishga o‘rgatilishini bildirdi.
Abrams tanki Germaniyada ishlab chiqarilgan Leopard 2’ga qaraganda yoqilg‘i ko‘p ketishi va murakkab texnikasi bilan ajralib turadi.
Polsha
Polsha ham Ukrainaga o‘zining 14 ta Leopard 2 tankini yuborishga tayyorligini bildirdi. 24-yanvar kuni Polsha hukumati nemis harbiy texnikasini Ukrainaga berish uchun Germaniyadan ruxsat so'raganini ma’lum qildi.
Polsha bosh vaziri Mateush Moraveski uning hukumati Yevropa Ittifoqidan Kiyevga jo‘natmoqchi bo‘lgan tanklari narxini qoplashni so‘rashini aytdi va bu harakatni “sinov” deb atadi.
Finlyandiya
Finlyandiya mudofaa vaziri Mikko Savola ham 25-yanvar kuni Leopard 2 tanklarini Ukrainaga yuborishni rejalashtirganini bildirdi.
“Ukrainaga Leopard jo‘natish bo‘yicha xalqaro hamkorlik hozir rivojlanmoqda va Finlyandiya bunda ishtirok etadi”, dedi Savola.
Rossiya bilan chegaradosh Finlyandiya Ukrainaga qancha tank yetkazib berishi hozircha aniqlanmagan.
Norvegiya
Polsha va Finlyandiya ketidan Norvegiya ham G‘arb harbiy yordami doirasida Ukrainaga Leopard 2 jangovar tanklarini yuboradi.
“Norvegiya Ukrainaga jangovar tanklar berishni qo‘llab-quvvatlamoqda. Mamlakat bu jarayonda ishtirok etadi”, — dedi Mudofaa vaziri Byorn Arild Gram. U qancha texnika yuborilishiga oydinlik kiritmagan.
Ispaniya
Ispaniya mudofaa vaziri uning mamlakati Ukrainaga o'z zaxirasidan Leopard 2 tanklarini berishga tayyor. Hukumat Ukrainaga Rossiya bosqiniga qarshi turishda yordam berishda boshqa G‘arb ittifoqchilari bilan hamjihatlikda harakat qilishini ta’kidlagan. Vazir Ispaniya berishi mumkin bo‘lgan tanklar soni haqida hech qanday izoh bermagan.
Niderlandiya
Mamlakat bosh vaziri Mark Rutte Niderlandiya Ukrainaga jangovar tanklar yetkazib berishga tayyorligini aytdi.
“Agar Niderlandiyaning shu orqali Ukrainaga yordam berishda hissasini qo‘shsa, biz bunga tayyormiz”, — dedi Rutte. U Niderlandiya Germaniyadan ijaraga olgan tanklarni sotib olib, Ukrainaga berishi mumkinligini ta’kidladi.
Mavzuga doir: Germaniya nihoyat Leopard tanklarini Ukrainaga yuborishga rozi bo‘ldi
Fotoreportaj: G‘arb Ukrainaga qanday qurollarni va’da qilmoqda?
