Ukraina Qurolli kuchlari G‘arb beradigan tanklardan bahordayoq foydalanishni boshlashi mumkin, dedi mamlakat mudofaa vaziri Aleksiy Reznikov CBC telekanaliga bergan intervyusida.
“Umid qilamanki, biz ulardan bahordayoq foydalanishni boshlaymiz. Gʻarb va’da qilgan tanklar bilan Ukraina Qurolli kuchlarida kamida ikkita tank batalyonlari tashkil etiladi. Ulardan qarshi hujumni davom ettirish uchun foydalaniladi”, — dedi Reznikov.
Vazir G‘arb davlatlari Ukrainaga tank yetkazib berishda davom etishiga ishonch bildirdi. “Bu (tanklarni yetkazib berish haqidagi e’lon — “Daryo” izohi) hikoyaning oxiri emas, balki boshlanishidir”, — dedi u.
Keyinroq The Washington Post nashri Jo Bayden va’da qilgan 31 ta Abrams M1A2 tanklari Ukrainaga 2023-yilning oxirida yetkazib berilishi mumkinligi haqida xabar berdi. Nashr maqolasida aytilishicha, tanklar AQSH harbiy zaxiralaridan olib berilmaydi, balki Ukraina xavfsizligini ta’minlash tashabbusi doirasida sotib olinadi.
Ukraina hukumati uzoq vaqtdan beri G‘arb davlatlaridan tanklar so‘rab kelayotgandi. 25-yanvar kuni AQSH hukumati Kiyevga 31 ta M1 Abrams tanklarini topshirishini ma’lum qildi. O‘z navbatida, Germaniya hukumati ham Ukrainaga Germaniya qurolli kuchlari zaxirasidan 14 ta Leopard 2 tankini jo‘natishi va boshqa davlatlarga reeksport uchun ruxsat berishini tasdiqladi. Shu kuni Norvegiya va Slovakiya Mudofaa vazirligi ham tanklarni Ukrainaga o‘tkazish niyati borligini ma’lum qildi. Avvalroq Kiyevni tanklar bilan ta’minlash qarori Buyuk Britaniya, Fransiya va Polsha rasmiylari tomonidan e’lon qilingandi.
Izoh (0)