Россия фронтга эски совет танкларини юбормоқда. Бу жанг майдонида устунлик берадими? (видео)

Россия фронтга 1940—1950 йилларда ишлаб чиқарилган Т-54 ва Т-55 эски совет танкларини юбормоқда. Мазкур танкларнинг жанг майдонида қандай аҳамиятга эгалиги бўйича тушунтириш берилди.

Ижтимоий тармоқларда Россия Украинадаги урушга совет танклари юбораётгани акс этган кадрлар эълон қилинди. Ҳарбий экспертлар зирҳли транспорт воситалари 1946 ва 1958 йилларда фойдаланишга топширилган эски совет Т-54 ва Т-55 танклари эканини аниқлади. Эҳтимол, улардан ҳеч қачон жангларда фойдаланилмаган, аммо ҳарбий парадлар учун ишлатилган ёки музейларда сақланган бўлиши мумкин.

BBC мухбири Павел Аксеновга кўра, Россиянинг эски зирҳли транспорт воситаларини омбордан олиб чиқиб, урушга жўнатиши биринчи ҳолат эмас. Илгари Т-55 нинг модернизацияси бўлган Т-62М танклари фронтда кўриниш берган. Урушда Украина томонида Т-55 нинг такомиллаштирилган версияси бўлган Словения М-55С танки ҳам иштирок этмоқда. Украинага етказиб берилиши кутилаётган немис Леопард-1 танклари ҳам модернизация қилинганига қарамай, замонавийларига нисбатан жуда эскирганини таъкидланган.

“Украинадаги уруш ҳажм аҳамиятга эга бўлган конфликтдир, шу учун Россияда зўрға ўқитилган аскарларни урушга сафарбар қилиш ва 1950 йиллардаги танкларни фронтга юбориш одатий ҳол. Ушбу мантиққа кўра, танк ҳар қандай ҳолатда ҳам мустаҳкамланган позицияларга ҳужум қилишда пиёдаларни қўллаб-қувватлай олади”, — дейди Аксенов.

У сўнгги ярим асрда замонавий танкларга қарши кураш воситалар илгарилаб кетгани, эски танклар осонликча нишонга олинишини қўшимча қилди.

“Т-55 қайта жиҳозланиши, уларга динамик ҳимоя блокларини ўрнатилиши мумкин. Сабаби танклар уларсиз оддий РПГ-7 гранаталардан йўқ қилиниши мумкин”, — дейди у.

BBC мухбири аммо 1960 йиллардаги танкларни 2020 йилларда жанг майдонида жиддий рол ўйнаши мумкин бўлган ҳарбий техникага айлантиришнинг иложи йўқлигини таъкидламоқда.

“Т-62 ва М-55 асосий версиядан жуда фарқ қилади. Биринчи навбатда бу ўқ отиш тизимига алоқадор. Т-55 ва Т-54 бир пайтлар 100 мм Д-10Т билан қуролланган бўлиб, ажойиб эди. Муаммо шундаки, 1940 йилларда шундай бўлган. Т-62 ҳам, М-55 ҳам анча яхши хусусиятларга эга янги ўт очувчи тизимга эга бўлди, бу уларни ҳеч бўлмаганда замонавий танк қуролларига бироз яқинлаштиради.

Т-54 ва Т-55 ни фронтга юбориш мақсадлардан бири бу — ҳарбийларнинг улардан фойдаланиш анча қулай бўлишидир. Т-72, Т-80 ва Т-90 замонавий танкларидан фойдаланиш мураккаб бўлиб, танкка ўтириш, ундан ўқ отишни ўрганишга кўп вақт ажрата олмайдиган одамларга уларни топшириш қийин”, — дейди у.

Аксенов шу сабабли ушбу транспорт воситаларининг экипажлари профессионал бўлмаслиги эҳтимоли катталиги, улар ҳатто эски танкларнинг имкониятларидан ҳам 100 фоиз фойдалана олмаслигини билдирди.