Amerika aerokosmik agentligi (NASA) 23 yildan keyin, ya’ni 2046-yil 14-fevral kuni Yerga 2023 DW nomli asteroid tushishi mumkinligini ma’lum qildi. Bu haqda New York Post xabar berdi.

2023 DW asteroidning diametri taxminan 49,29 metrni tashkil etadi va hozir Yerdan taxminan 0,12 astronomik birlik masofasida joylashgan. Astronomik birlik Yer markazi va Quyosh markazi orasidagi o‘rtacha masofa hisoblanadi. Quyoshga nisbatan asteroid sekundiga taxminan 24,64 kilometr tezlikda harakatlanmoqda. 2023 DW Quyosh atrofini taxminan 271 kun davomida bir marta aylanadi. U NASA’ning potensial xavfli asteroidlar ro‘yxatida Yerga ta’sir qilish ehtimoli noldan yuqori bo‘lgan kosmik obyektlarning birinchi o‘rnida turadi.

2023 DW Turin shkalasi bo‘yicha 1 ballga ega bo‘lgan “xavfli ro‘yxatdagi” yagona asteroid bo‘lib, bu Yer bilan to‘qnashish xavfini tasniflash uchun ishlatiladi. Qolgan asteroidning hammasi 0 ballga ega. Yerga yaqin obyektlarni o‘rganish markazi ma’lumotlariga ko‘ra, 1 ball to‘qnashuv ehtimoli “dargumon va jamoatchilikni tashvishga solmaydi”.

NASA 2023 DW’ni kuzatib, uning "2046 yilda Yerga tushishi ehtimoli kam" ekanini bildirmoqda.

“Ko‘pincha yangi obyektlar birinchi marta kashf etilganda, noaniqliklarni kamaytirish va ularning harakatini yillar davomida prognoz qilish uchun bir necha haftalik ma’lumotlar kerak bo‘ladi. Tahlilchilar uning harakatini kuzatishda davom etadi”, deb yozdi NASA Asteroid Watch Twitter’da.