Qozog‘istonda ishonchni yo‘qotgan davlat amaldorlari ishdan bo‘shatiladi

Qozog‘istonda senatning yalpi majlisida deputatlar ishonchini yo‘qotgan siyosiy xizmatchilarni ishdan bo‘shatish haqidagi qonunga o‘zgartirishlar kiritildi. Bu haqda Ulys media xabar berdi.

Hujjatga ko‘ra, ishonchni yo‘qotganlik uchun ishdan bo‘shatish haqidagi qarorni faqat Qozog‘iston prezidenti qabul qiladi va ushbu qaror faqat davlat rahbari tomonidan tayinlanadigan davlat xizmatchilariga tegishlidir.

“Qonunga ko‘ra, siyosiy xizmatchi siyosiy vazifalarni amalga oshirish uchun mas’ul xodim hisoblanadi, ularga yuklatilgan mas’uliyat katta. Prezident administrasiyasi topshirig‘iga ko‘ra, shu munosabat bilan, ishonchni yo‘qotgani sababli o‘z vakolatlarini ma’lum darajada bajarmagan siyosiy xizmatchini lavozimidan ozod etish instituti joriy etilmoqda”, — dedi Davlat xizmati ishlari agentligi rahbari Darxon Jaziqboyev.

Shuningdek, Qozog‘istonda “shartnoma asosida ishlaydigan xodimlar” tushunchasi joriy qilinadi. Ular davlat xizmatchilari sifatida tasniflanmaydi. Chunki ular ma’lum bir loyihani amalga oshirish doirasida faqat bir yil ishlash uchun jalb qilinadi.