Qozog‘istonning sobiq mudofaa vaziri Murat Bektanov 12 yillik qamoq jazosiga hukm qilindi. Bu haqda Ixtisoslashtirilgan tumanlararo harbiy sudga tayanib, Kazinform xabar berdi.
Ma’lum qilinishicha, Murat Bektanov ishi bo‘yicha sud hukmi 2023-yil 24-fevralda e’lon qilingan.
“M.Bektanov Jinoyat ishlari bo‘yicha ixtisoslashtirilgan tumanlararo harbiy sudining 2023-yil 24-fevraldagi hukmi bilan Qozog‘iston respublikasi Jinoyat kodeksining 451-moddasi 3-qismi bo‘yicha sudlangan. Unga nisbatan 12 yil muddatga ozodlikdan mahrum qilish jazosi tayinlandi”, — deyiladi sud xabarida.
Ushbu moddaga ko‘ra, u muayyan lavozimlarni egallash yoki muayyan faoliyat bilan shug‘ullanish huquqidan umrbod mahrum etiladi. Qozog‘iston sobiq mudofaa vaziri jazo muddatini jazoni ijro etish tizimidagi maksimal xavfsizlik muassasasida o‘taydi. Sud ishning “sirli” grif ostida ko‘rib chiqilganiga ishora qilib, batafsilroq ma’lumot bermagan.
Eslatib o‘tamiz, Qozog‘iston sobiq mudofaa vaziri etib 2022-yilda qayta saylangan Murat Bektanov yanvar voqealaridan so‘ng o‘z lavozimidan chetlashtirilgandi. 20-fevral kuni u Qozog‘iston respublikasi Jinoyat kodeksining 452-moddasi bilan (xizmat faoliyatida harakatsizlik fakti bo‘yicha) qo‘lga olingan. Keyinroq Bosh prokuratura Bektanov ishi Qozog‘iston Jinoyat kodeksining 451-moddasi 3-qismi (xizmat vakolatlarini suiiste’mol qilish) bilan kvalifikatsiya qilinganini ma’lum qilgan.
2023-yilning yanvar oyida Bosh prokuror Berik Asilov Bektanov “ochiq-oydin noqonuniy buyruqlar bergani va harbiy strategik obyektlarni himoyasiz qoldirgani” va “mansab vakolatini suiiste’mol qilganlikda ayblanayotgani”ni aytgan.
Izoh (0)