Shimoliy Koreya hukumati mamlakat yetakchisi Kim Chen Inning 10 yoshli qizi Chju Ega ismdosh bo‘lgan qiz va ayollardan ismini o‘zgartirishni talab qilmoqda. Bu haqda Radio Free Asia xabar berdi.
“Chxonjin shahri xavfsizlik boshqarmasi 8-fevral kuni Chju E nomi bilan ro‘yxatdan o‘tgan ayollarga qo‘ng‘iroq qildi va ularga ismlarini o‘zgartirishni buyurdi”, — deyiladi xabarda.
KXDR rasmiylariga ko‘ra, bu ism yuqori martabali shaxs, ya’ni mamlakat rahbarining qizi uchun “zaxiralangan” bo‘lishi kerak. Bunday siyosat mahalliy aholi tomonidan tanqid qilinmoqda. O‘z navbatida, The Korea Times nashri o‘n yil oldin xuddi shunday holat KXDR yetakchisi ismiga ham tegishli bo‘lganini ma’lum qildi. Jumladan, Kim Chen In ismli erkaklar ismini o‘zgartirishga majbur bo‘lgan.
“Ko‘rsatma ixtiyoriy bo‘lgan, lekin Shimoliy Koreyada juda ham kam qonunlar ixtiyoriy ravishda amalga oshiriladi. Ayniqsa, rahbariyatning buyruqlari haqida gap ketganda”, — deydi Insider nashri manbasi.
Kim Chen Inning merosxo‘ri — Chju E haqida nimalar ma’lum?
2022-yil noyabrida Shimoliy Koreya yetakchisi Kim Chen In o‘zining qizi Chju Eni dunyoga birinchi marta ko‘rsatdi. Bungacha KXDRning 38 yoshli yetakchisining hech bir farzandi ommaga namoyish qilinmagan. Chju E mamlakatdagi eng yirik qit’alararo ballistik raketani ishga tushirish jarayonida otasi yonida ko‘rinish bergan.
Vashingtondagi Stimson markazining Shimoliy Koreya bo‘yicha eksperti Maykl Maddenning fikricha, Kim o‘z qizini ommaga olib chiqish orqali qizi hokimiyat davomchisi ekanini ko‘rsatishi mumkin. Yanvar oyida Shimoliy Koreya yetakchisi qizi bilan qo‘shinlar va qit’alararo ballistik raketani tekshirish davomida ko‘rinish berdi. KXDR davlat axborot agentligi KCNA qizni Kim Chen Inning “eng sevimli” va “qimmatli” farzandi deb atagan.
Ayrim tahlilchilarning fikricha, Kim Chen In erta bosqichda hokimiyatning ehtimoliy merosxo‘ri nomini aytib, otasi yo‘l qo‘ygan xatodan qochishga harakat qilmoqda.
Izoh (1)
адаш эмас, отдош булади,