Шимолий Корея ҳукумати мамлакат етакчиси Ким Чен Иннинг 10 ёшли қизи Чжу Эга исмдош бўлган қиз ва аёллардан исмини ўзгартиришни талаб қилмоқда. Бу ҳақда Radio Free Asia хабар берди.
“Чхонжин шаҳри хавфсизлик бошқармаси 8 февраль куни Чжу Э номи билан рўйхатдан ўтган аёлларга қўнғироқ қилди ва уларга исмларини ўзгартиришни буюрди”, — дейилади хабарда.
КХДР расмийларига кўра, бу исм юқори мартабали шахс, яъни мамлакат раҳбарининг қизи учун “захираланган” бўлиши керак. Бундай сиёсат маҳаллий аҳоли томонидан танқид қилинмоқда. Ўз навбатида, The Коrеа Times нашри ўн йил олдин худди шундай ҳолат КХДР етакчиси исмига ҳам тегишли бўлганини маълум қилди. Жумладан, Ким Чен Ин исмли эркаклар исмини ўзгартиришга мажбур бўлган.
“Кўрсатма ихтиёрий бўлган, лекин Шимолий Кореяда жуда ҳам кам қонунлар ихтиёрий равишда амалга оширилади. Айниқса, раҳбариятнинг буйруқлари ҳақида гап кетганда”, — дейди Insider нашри манбаси.
Ким Чен Иннинг меросхўри — Чжу Э ҳақида нималар маълум?
2022 йил ноябрида Шимолий Корея етакчиси Ким Чен Ин ўзининг қизи Чжу Эни дунёга биринчи марта кўрсатди. Бунгача КХДРнинг 38 ёшли етакчисининг ҳеч бир фарзанди оммага намойиш қилинмаган. Чжу Э мамлакатдаги энг йирик қитъалараро баллистик ракетани ишга тушириш жараёнида отаси ёнида кўриниш берган.
Вашингтондаги Stimson марказининг Шимолий Корея бўйича эксперти Майкл Мадденнинг фикрича, Ким ўз қизини оммага олиб чиқиш орқали қизи ҳокимият давомчиси эканини кўрсатиши мумкин. Январь ойида Шимолий Корея етакчиси қизи билан қўшинлар ва қитъалараро баллистик ракетани текшириш давомида кўриниш берди. КХДР давлат ахборот агентлиги KCNA қизни Ким Чен Иннинг “энг севимли” ва “қимматли” фарзанди деб атаган.
Айрим таҳлилчиларнинг фикрича, Ким Чен Ин эрта босқичда ҳокимиятнинг эҳтимолий меросхўри номини айтиб, отаси йўл қўйган хатодан қочишга ҳаракат қилмоқда.
Изоҳ (1)
адаш эмас, отдош булади,