Turkiya prezidenti Rajab Toyyib Erdo‘g‘on zilzilalardan so‘ng Turkiyaga yordam ko‘rsatgan barcha davlatlarga minnatdorlik bildirdi. Bu haqda Anadolu xabar berdi.
BAA tashabbusi bilan tashkil etilgan Jahon hukumati sammiti ishtirokchilariga yo‘llagan videomurojaatida Erdo‘g‘on “Turkiya qiyin paytlarda yordam qo‘lini cho‘zganlarni unutmasligini” ta’kidladi.
“Ayrim davlatlar Turkiyaga qutqaruvchilar yubordi, ayrimlari esa yordam yig'ish kampaniyalarini boshlab, birdamlik ko'rsatdi. Ba’zi mamlakatlar Anqarani qo‘llab-quvvatlashini bildirdi. Zilzila ofati xalqaro birdamlikning muhimligini yana bir bor isbotladi”, — dedi Turkiya prezidenti.
Erdo‘g‘on mamlakatda 13,5 million kishi zilzila oqibatlarini his qilganini aytdi.
“Olimlar zilzila kuchi 500 ta atom bombasi portlashiga teng energiya chiqarganini aytdi”, — dedi u.
Siyosatchi Turkiya nafaqat o‘z tarixidagi, balki insoniyat tarixidagi eng yirik tabiiy ofatlardan biriga duch kelganini qo‘shimcha qildi. Turkiya hukumatining Favqulodda vaziyatlar boshqarmasi zilzila qurbonlari soni 31 974 kishiga yetganini ma’lum qildi.
Izoh (0)