Respublika ta’lim markazi ota-onalar bolalarga begonalar bilan muloqot qilish madaniyatini o‘rgatishda bilishi kerak bo‘lgan bir nechta qoidalarni sanab o‘ tdi.
Qayd etilishicha, bolalarga notanish odamlar bilan gaplashish qoidalarini qanday o‘rgatish uning yoshiga bog‘liq. Masalan, maktabgacha yoshdagi bolalar notanish odam kim ekanini bilmaydi va kim xavfli, kim xavfsiz ekanini ajrata olmaydi.
“Siz ularga asosiy xavfsizlik qoidalarini o‘rgatishni boshlashingiz mumkin, ammo begona odamlar qanday xavf tug‘dirishi mumkinligi haqidagi suhbatlar ularning tashqi olam bilan munosabatiga salbiy ta’sir qilishi mumkin. Shuning uchun ular yaqinlari va bog‘cha opalari tomonidan har daqiqada kuzatuv ostida bo‘lishlari maqsadga muvofiq”.
Maktab yoshidagi bolalar esa bog‘cha bolalariga qaraganda jamoat joylarida ko‘proq bo‘lishadi. Shuning uchun ular begonalar bilan qanday munosabatda bo‘lishi haqida aniq ko‘rsatmalarga muhtoj. Notanish odamlar haqida gapirganda, ommaviy axborot vositalarining ayanchli voqealariga qaramay, begona odamlar haqida keskin munosabat bildirish ularning ijtimoiylashuviga salbiy ta’sir qilishi mumkinligini unutmang.
“Ularga notanish odamlar orasida ham ishonchli odamlar bo‘lishi mumkinligini, va biror xavf tug‘ilsa yoki yordam kerak bo‘lsa kimga murojaat qilish mumkinligini tushuntiring. Bunday odamlar bolangizning maktabdagi o‘qituvchilari, ichki ishlar xodimlari, korxonalar, biznes markazlarida, do‘konlarda xizmat ko‘rsatayotgan xodimlar bo‘lishi mumkin. Ammo, shu bilan birga, bunday odamlarni kiyimidan yoki lavozimi ismi yozilgan belgilardan tanish mumkinligini ham ta’kidlang”.
Shuningdek, bolalarga agar kimdir undan shaxsiy ma’lumotlarini so‘rasa, hech qachon aytmasligini, begona odamlar tomonidan taklif qilingan shirinliklar, o‘yinchoqlar va boshqa narsalarni olmaslikni, ular bilan hamroh bo‘lmaslikni va agar bu notanish odam unga yaqinlashmoqchi bo‘lsa, yaqin oradagi tanish odamlar bor joyga ketish kerakligini aytish zarur.
Eslatib o‘tamiz, Yangihayot tumanida zo‘rlik va qotillik alomatlari bilan 12 yoshli qizning murdasi topilgandi. Mazkur holat yuzasidan jinoyat ishi qo‘zg‘atilgan. Jinoyat ishi bo‘yicha gumonlanuvchi shaxs (29 yoshli erkak) Jinoyat-prosessual kodeksining 221-moddasi tartibida ushlangan.
Shundan so‘ng Toshkent shahri Oila va xotin-qizlar boshqarmasi maktab o‘quvchilarining ota-onalariga murojaat qilgandi. Ta’kidlanishicha, ota-onalar farzandlariga o‘zi hamrohlik qilishi va maktabga olib borib maktabdan olib ketishi kerak. Ular bilan doimo aloqada bo‘lib turish lozim.
Izoh (0)