Samarqandda uydan 200 mln so‘mlik taqinchoqlarni o‘g‘irlagan yigitlar ushlandi

Samarqand shahrida Zarmetan ko‘chasidagi xonadonlardan birida 25-yanvar kuni 200 million so‘mlik tilla taqinchoqlar o‘g‘irlab ketildi. Bu haqda Tergov departamenti xabar berdi.

Qayd etilishicha, 26-yanvar kuni shu ko‘chada yashovchi 22 yoshli N.X. ichki ishlarga murojaat qilib, uyiga kirib, mehmonxonasidagi shkaf ustida turgan 25-30 turdagi, bahosi 200 million so‘mlik tilla taqinchoqlarini yashirin ravishda o‘g‘irlab ketgan noma’lum shaxsni topishni so‘ragan.

Olib borilgan tergov-tezkor harakatlar natijasida mazkur jinoyatni 23 yoshli X.A va voyaga yetmagan 16 yoshli T.D. sodir qilganligi aniqlanib, ulardan 3 million 950 ming so‘m pul, 3 dona ayollar zanjiri, 3 dona uzuk, 2 juft zirak va 1 dona erkaklar soati ashyoviy dalil tariqasida rasmiylashtirib olingan.

Jinoyatni sodir etgan ushbu shaxslarga nisbatan Jinoyat kodeksining 169-moddasi (O‘g‘rilik) 4-qismi “a” bandi bilan ayblov e’lon qilinib, voyaga yetmagan T.D.ga uy qamog‘i X.A.ga esa qamoqqa olish tarzidagi ehtiyot chorasi qo‘llanilgan. Hozirda tergov harakatlari olib borilmoqda.