Ijtimoiy tarmoqlarda Toshkent shahrida maktab o‘quvchilarini o‘g‘irlamoqchi bo‘lishayotgani haqida xabarlar tarqaldi. Ichki ishlar vazirligi holatga munosabat bildirdi.
Qayd etilishicha, joriy yilning 1-fevral kuni Shayxontohur tumanida 113-sonli maktabning 11-sinf o‘quvchisi F.N. boshqaruvidagi avtomashinaga 132-sonli maktab o‘quvchilari G.B. va S.N. yerdagi muz bo‘lagini tepgan.
Shundan so‘ng 11-sinf o‘quvchilari muz bo‘lagini tepgan bolalarni “ichki ishlarga olib boramiz” deb ularni og‘zaki qo‘rqitgan. Bolalar boshqa bunday qilmasligini aytib uyiga ketishgan.
“Hozirgi vaqtda bolalar sog‘-salomat ota-onasi bag‘rida”, — deyiladi xabarda.
Bundan tashqari, avtomashinani boshqarish huquqi bo‘lmagan maktab o‘quvchilarining ota-onasi bilan birga huquqbuzarlikka yo‘l qo‘ymaslik yuzasidan profilaktik suhbat o‘tkazilgan.
Izoh (0)