O‘zbekistonda pedofiliya uchun eng og‘ir jazo berish taklif qilindi

“Yuksalish” umummilliy harakati rahbari Bobur Bekmurodov pedofiliya uchun eng og‘ir jazo berish taklif qildi.

Taklifga ko‘ra, pedofiliya va jinsiy jinoyatlar uchun eng og‘ir jazo berilishi va qo‘shimcha jazo choralari kiritilishi kerak. 

“Pedofiliya bu shunchaki jinoyat emas, xalqaro kasalliklar kvalifikasiyasiga kiritilgan o‘ta og‘ir ruhiy kasallik. Bunday bemorlar 25 yil qamoqdan keyin ham jamiyatga shunchaki qaytarilmasligi kerak. 

Majburiy davolash, kimyoviy va jismoniy bichish amaliyotlarini ham joriy qilishda shubha bo‘lmasligi zarur”, — deb yozadi Bekmurodov.

Eslatib o‘tamiz, Yangihayot tumanida zo‘rlik va qotillik alomatlari bilan 12 yoshli qizning murdasi topilgandi. Mazkur holat yuzasidan jinoyat ishi qo‘zg‘atilgan. Jinoyat ishi bo‘yicha gumonlanuvchi shaxs (29 yoshli erkak) Jinoyat-prosessual kodeksining 221-moddasi tartibida ushlangan.

Shundan so‘ng Toshkent shahri Oila va xotin-qizlar boshqarmasi maktab o‘quvchilarining ota-onalariga murojaat qilgandi. Ta’kidlanishicha, ota-onalar farzandlariga o‘zi hamrohlik qilishi va maktabga olib borib maktabdan olib ketishi kerak. Ular bilan doimo aloqada bo‘lib turish lozim.