AQSHda politsiya 17 yoshli afg‘onistonlik yigitga o‘q uzdi (video)
AQSHning Kaliforniya shtati Treysi shahrida politsiya afg‘onistonlik 17 yoshli yigitga ikki marta o‘q uzdi. Bu haqda Al-Arabia xabar berdi.
Ma’lum qilinishicha, jabrlanuvchi o‘q jarohati bilan kasalxonaga yotqizilgan. Yigit pichoq bilan qurollangani, boshqa erkakni ta’qib qilishga uringani aytilgan. Holat yuzasidan politsiya xodimi voqea joyiga kelgan va yigitga pichoqni tashlashni buyurgan.
Treysi shahar politsiya bo‘limi afg‘onistonlik yigit buyruqni bajarmagach, politsiya tomonidan o‘qqa tutilganini ma’lum qilgan. O‘smir pichoq jarohati bilan yaqin atrofdagi kasalxonaga yotqizilgan. Treysi Kaliforniya polisiyasi tergov tugagandan so‘ng jinoiy hodisa haqida batafsil ma’lumot berishini ma’lum qilgan.
Amerika-Islom munosabatlari kengashining Sakramento vodiysi/Markaziy Kaliforniya bo‘limi o‘q uzilgan yigit musulmon ekanini bildirib, mustaqil tergov o‘tkazishga chaqirgan.
“Biz mazkur tashvishli hodisani kuzatmoqdamiz va huquqni muhofaza qilish organlaridan to‘liq shaffoflik bilan ishlashni va bu ish bo‘yicha barcha faktlarni tezda ommaga e’lon qiladigan mustaqil tergov o‘tkazishni talab qilamiz", — deyiladi Amerika-Islom munosabatlari kengashi bayonotida.
Avvalroq AQSHning Virjiniya shtatida boshlang‘ich maktabning olti yoshli birinchi sinf o‘quvchisi o‘z o‘qituvchisiga o‘q uzgandi. O‘quvchi va o‘qituvchi o‘rtasida kelishmovchilik yuzaga kelgan, shundan keyin bolakay unga to‘pponchadan o‘q uzgan.
Shuningdek, AQSHda it egasini miltiq bilan otib qo‘ygan, oqibatda jabrlanuvchi vafot etgan. Marhum mashinaning oldingi yo‘lovchi o‘rindig‘ida ketayotgan bo‘lgan. Hodisa joyiga kelgan shifokorlar erkakni qutqarishga harakat qilgan, biroq u voqea joyida vafot etgan.
