Rossiya prezidenti Vladimir Putin va Qozog‘iston prezidenti Qosim-Jo‘mart To‘qayev telefon orqali suhbatlashdi. Ular ikki mamlakat o‘rtasidagi sheriklikni, shu jumladan, energetika sohasidagi hamkorlikni rivojlantirishni muhokama qildi.
“Vladimir Putinning Qosim-Jo‘mart To‘qayev bilan telefon orqali muloqoti chog‘ida Rossiya-Qozog‘iston strategik sherikligi va ittifoqini rivojlantirish bo‘yicha dolzarb mavzular muhokama qilindi”, — deyiladi Kreml saytida e’lon qilingan xabarda.
Qozog‘iston prezidenti matbuot xizmati ma’lum qilishicha, tomonlar iqtisodiyot, energetika va boshqa bir qator sohalardagi aloqalarni rivojlantirishni muhokama qilgan.
So‘nggi marta Putin va To‘qayevning muloqoti haqida 3-yanvar kuni rasman xabar berilgandi. Ikki mamlakat yetakchilari bir-birini Yangi yil bilan tabriklagan. 28-noyabr kuni esa Kremlda ular muzokaralar o‘tkazgandi. O‘shanda tomonlar boshqa masalalar bilan bir qatorda, Rossiya, Qozog‘iston va O‘zbekiston o‘rtasida “uch tomonlama gaz ittifoqi”ni yaratishni muhokama qilgan.
2022-yil iyunida QazaqGaz va “Gazprom” Qozog‘istondan Rossiyaga gaz qayta ishlab yuborish hajmini oshirish haqida shartnoma imzolagandi. 30-dekabr kuni esa Rossiya Qozog‘iston bilan Rossiya neftini Xitoyga tranzit qilish to‘g‘risidagi bitim muddatini uzaytirdi. Hujjat 2034-yil 1-yanvargacha amal qiladi. Shuningdek, Rossiya Qozog‘istonga o‘z quvurlari orqali Germaniyaga neft yetkazib berish uchun ruxsat berdi.
Mavzuga doir:
Izoh (0)