Putin To‘qayevdan Makronga maktub berib yuborganini Kreml rad etdi

Rossiya prezidenti Vladimir Putin Qozog‘iston prezidenti Qosim-Jo‘mart To‘qayev bilan suhbat chog‘ida undan Fransiya rahbari Emmanuel Makronga hech qanday xabar yetkazishni so‘ramagan. Bu haqda Rossiya prezidenti matbuot kotibi Dmitriy Peskov ma’lum qildi, deb yozadi “Kommersant”.

“Vladimir Putin To‘qayev orqali Emmanuel Makronga qandaydir xat-xabar jo‘natdimi?” — degan savolga Dmitriy Peskov: “Yo‘q”, — deb javob berdi.

Rossiya va Qozog‘iston prezidentlari 28-noyabr kuni Moskvada uchrashdi. 23-noyabr kuni Emmanuel Makron yaqin kunlarda Vladimir Putin bilan bevosita muloqot qilishini aytgandi.

Kreml saytidagi ma’lumotlarga ko‘ra, Putin va Makron so‘nggi marta 11-sentabr kuni muloqot qilgan, u avgustdagi suhbatdan keyingi birinchisi bo‘lgan. O‘shanda Fransiya prezidenti Rossiya rahbaridan yana Ukrainadagi jangovar harakatlarni to‘xtatishni so‘ragan. Shundan keyin Peskov Putin Makron bilan boshqa gaplashmayotganini, chunki u Rossiyaning pozitsiyasiga quloq tutmaganini aytgandi.

Qozog‘iston prezidenti Qosim-Jo‘mart To‘qayev ayni paytda rasmiy tashrif bilan Fransiyada bo‘lib turibdi. U Moskvada Putin bilan muzokaralar o‘tkazganidan keyin darhol Parijga uchib ketgandi.