Fransiyada hukumat tomonidan rejalashtirilayotgan pensiya islohoti hamda pensiya yoshini ikki yilga oshirishga qarshi ommaviy norozilik namoyishlari va ish tashlashlar boshlandi. 19-yanvar kuni ko‘plab boshlang‘ich maktablar yopildi, davlat va yuridik teleradiokompaniyalar o‘zlarining muntazam dastur va musiqa eshittirishlarini to‘xtatdi, temiryo‘l va shahar transporti keskin cheklandi. Parij aeroportlarida ko‘plab reyslar bekor qilindi.
Fransiya milliy EDF energetika konserni xodimlari elektr energiyasi ishlab chiqarishni biroz qisqartirdi. OAV ma’lumotlariga ko‘ra, ish tashlashda TotalEnergies neftni qayta ishlash zavodlari ishchilarining 70 foizdan 100 foizigacha ishtirok etgan. Kunning birinchi yarmidayoq Nitssa, Marsel, Tuluza va boshqa shaharlarda namoyishlar boshlangan. 200 dan ortiq shahardagi namoyishlarda yuz minglab odamlar ishtirok etishi kutilmoqda.
“Demokratik mehnat konfederatsiyasi” (CFDT) rahbari Filipp Martin 19-yanvarni “eng kuchli norozlik kuni” deb atadi. Uning so‘zlariga ko‘ra, bu kamdan-kam uchraydigan holat bo‘lib, barcha kasaba uyushmalarini norozilik namoyishiga chaqirish muammoning jiddiyligidan dalolat beradi.
Pensiya islohoti — Makronning saylovoldi kampaniyasidagi asosiy va’dalardan biri
Makron hukumatining islohot rejasiga ko‘ra, 2030-yilgacha eng kam pensiya yoshi bosqichma-bosqich 62 yoshdan 64 yoshga ko‘tariladi. Har yili pensiya yoshini uch oyga oshirish taklif qilinmoqda. Bosh vazir Elizabet Bornning aytishicha, birinchi bosqich 1-sentabrga rejalashtirilgan. Hukumat rahbari islohotdan ko‘zlangan maqsad pensiya ta’minotining muvozanatli tizimini ta’minlash ekanini ta’kidladi. Shu bilan birga, u reja fransuzlar orasida “savol va xavotirlar uyg‘otayotganini” ham tan oldi.
CFDT kasaba uyushmasi bosh kotibi Loran Bergening so‘zlariga ko‘ra, bu o‘zgarish, ayniqsa, faoliyatini erta boshlagan ishchilarga ta’sir qiladi. “Pensiya tizimi xavf ostida emas, bunday qattiq islohotni hech narsa bilan oqlab bo‘lmaydi”, — dedi u boshqa kasaba uyushma tashkilotlari rahbarlari bilan uchrashuvda. Berge 19-yanvarni umummilliy ish tashlashning birinchi kuni deb e’lon qilgan.
Fransiyada hozirgi pensiya yoshi 62 yosh, ammo agar fuqaro o‘sha yoshda nafaqaga chiqishni tanlasa, u pensiyani to‘liq miqdorda olmaydi. 2019-yilda fransuz hukumati 2025-yildan boshlab to‘liq pensiya olish uchun kamida 64 yoshga to‘lgunga qadar ishlash kerakligi haqida limit belgilagandi. Bunday holda, shaxs 1000 yevro miqdorida kafolatlangan to‘lovni talab qilishi mumkin bo‘ladi.
O‘tgan bahorda, prezidentlik saylovlaridan bir necha hafta oldin Makron, agar u qayta saylansa, Fransiyada pensiya yoshi sekin-asta 65 yoshga ko‘tarilishini aytgandi. Bu “ish va vazifalarning realligini hisobga olish” imkonini beradi hamda keksalar o‘rtasida ishsizlikka qarshi kurashda ham yordam beradi, degan u.
Izoh (0)