Rossiya bosh vaziri Mixail Mishustin 19-yanvar kuni Turkmaniston-Rossiya forumida qatnashish uchun ishchi tashrif bilan Ashxobodga keldi, deb yozadi “Kommersant”.
U ikki tomonlama hamkorlikning asosiy yo‘nalishlarini belgilab berdi, xususan, ayni paytda bor-yo‘g‘i 1 milliard dollarga baholanayotgan tovar aylanmasini kengaytirish zarurligini qayd etdi.
Moskva ham, Ashxobod ham, Turkmanistonning tranzit salohiyatini hisobga olgan holda, savdo hajmini oshirish uchun urg‘uni logistikani rivojlantirishga berishni rejalashtirmoqda.
Mishustin ta’kidlashicha, Moskva va Ashxobod o‘rtasidagi hamkorlikni rivojlantirishda hozirgi “nostandart sharoitlarda” yangi imkoniyatlar mavjud: Turkmaniston biznesi Rossiya bozorida u yerni G‘arb kompaniyalari tark etganidan keyin “bo‘shab qolgan” ba’zi joylarni egallashi mumkin.
O‘z navbatida, Rossiya Iqtisodiyot vazirligi ma’lumotlariga ko‘ra, ayni paytda Rossiya biznesi Turkmanistonda jami 3,5 milliard dollarlik 20 ta investitsiya loyihalarida qatnashmoqda.
Eslatib o‘tamiz, Turkmaniston va Rossiya prezidentlari Serdar Berdimuhamedov va Vladimir Putin 17-yanvar kuni telefon orqali suhbatlashgan edi. Ular Rossiya-Turkmaniston strategik sherikligi bo‘yicha erishilgan darajani yuqori baholab, energetika sohasidagi amaliy hamkorlik bo‘yicha bir qator muayyan masalalarni muhokama qilgan.
Avvalroq Turkmaniston bosh vaziri o‘rinbosari Shohim Abdurahmonov mamlakatda birinchi yerosti gaz ombori qurilishini ma’lum qilgan edi. Uning so‘zlariga ko‘ra, gaz ombori “tovar gazi zaxiralarini ta’minlash uchun” quriladi.
Tabiiy gaz zaxiralari bo‘yicha Turkmaniston Rossiya, Eron va Qatar bilan birgalikda dunyoning birinchi to‘rtligiga kiradi.
2019-yil aprelida “Gazprom” Turkmaniston bilan shartnomali aloqalar qayta tiklanganini ma’lum qildi, munosabatlar 2016-yilda bir tomonlama tartibda bekor qilingan edi. O‘sha yiliyoq Rossiya kompaniyasi Turkmangaz” davlat kompaniyasida tabiiy gaz sotib olish bo‘yicha shartnoma tuzdi. Uning doirasida “Gazprom” yiliga 5,5 milliard kub metr gaz oladi.
Izoh (0)