Qozog‘iston Rossiyadan Qozog‘iston, RF va O‘zbekiston o‘rtasida gaz ittifoqi bo‘yicha alohida tashkilot tuzish haqida qandaydir rasmiy takliflar olmagan. Hozircha bu gaz savdosi jarayonlarini integratsiyalash bo‘yicha bir g‘oya, xolos. Bu haqda Qozog‘iston tashqi ishlar vaziri o‘rinbosari Almas Aydarov ma’lum qildi.
“Gaz ittifoqini tuzish Rossiya tomonining taklifi edi, va u hozircha hech qanday hujjat bilan rasmiylashtirilmagan, bu qanday shaklda amalga oshirilishi bo‘yicha hech qanday tafsilotlar va takliflarni Rossiya tomonidan olganimizcha yo‘q. Bu hozircha gaz savdosi bo‘yicha qandaydir jarayonlarni integratsiyalashga oid bir g‘oya, xolos”, — dedi Aydarov parlament yig‘ilishida.
Uning ta’kidlashicha, hamma narsa Qozog‘istonga taklif qilinadigan shartlarga bog‘liq bo‘ladi. Qozog‘iston tashqi ishlar vaziri o‘rinbosarining so‘zlariga ko‘ra, gaz bo‘yicha alohida tuzilma yoki davlatlararo ittifoq tuzish masalasi hozircha ko‘tarilgani yo‘q.
“Bu gaz yetkazib berish, uni tartibga solish va narx bo‘yicha g‘oya edi, xolos. Gaz tanqisligi barcha mamlakatlarda mavjud, shuning uchun Rossiya tomoni shunday taklif bilan chiqdi”, — deya aniqlik kiritdi Almas Aydarov.
Noyabr oxirida Rossiya va Qozog‘iston prezidentlari Vladimir Putin va Qosim-Jo‘mart To‘qayev Moskvada uchrashuv o‘tkazib, Rossiya, Qozog‘iston va O‘zbekiston ishtirokida “uch tomonlama gaz ittifoqi” tuzishni muhokama qildi. 7-dekabr kuni O‘zbekiston energetika vaziri Jo‘rabek Mirzamahmudov mamlakat tijoriy shartnomalar asosida gaz import qilishni rejalashtirayotgani, buning uchun “qandaydir alyans yoki ittifoq”qa a’zo bo‘lish shart emasligini aytdi.
Avvalroq Qozog‘iston energetika vazir Bolat Akchulakov Rossiya va O‘zbekiston ishtirokida gaz ittifoqini tuzish imkoniyatlari haqida gapirgandi. Uning so‘zlariga ko‘ra, aslida uch tomonlama gaz ittifoqi masalasi muhokama qilinmadi. “Barcha muhokamalar ikki tomonlama hamkorlik formatida bo‘ldi. Masalan, Qozog‘iston — Rossiya, Qozog‘iston —O‘zbekiston. Ya’ni bu uch tomonlama formatda muhokama qilinmadi”, — dedi Akchulakov.
Izoh (0)