Armanistondagi harbiy qismda 15 kishining hayotiga zomin bo‘lgan yong‘in xavfsizlik qoidalarining buzilishi tufayli yuzaga kelgan. Armaniston mudofaa vaziri Suren Papikyan hukumat yig‘ilishida hodisaning sababini shunday tavsifladi.
“Harbiy politsiyaning dastlabki ma’lumotlariga ko‘ra, yong‘in harbiy xizmatchilarning taqiqlangan modda — benzinni qo‘llashi oqibatida sodir bo‘lgan”, — dedi vazir.
Armaniston Tergov qo‘mitasi rahbari Argishti Kyaramyanning aytishicha, ikki yoki undan ortiq odam o‘limiga sabab bo‘lgan xavfli materiallar bilan ishlash qoidalarining buzilishi moddasi bilan jinoiy ish qo‘zg‘atilgan. “Yong‘in binoni isitish vaqtida xavfsizlik qoidalarining buzilishi ortidan sodir bo‘lgan, degan dastlabki versiya mavjud”, — qo‘shimcha qildi qo‘mita rahbari.
O‘z navbatida Armaniston bosh vaziri Nikol Pashinyan 2022-yil dekabr oyida respublika Qurolli kuchlari Bosh shtabi boshlig‘i Edvard Asryan pechkalarni yoqish uchun benzin va boshqa tez yonuvchi suyuqliklardan foydalanishni taqiqlaganini aytdi. Hukumat rahbarining ta’kidlashicha, dastlabki ma’lumotlarga ko‘ra, ofitser kazarmadagi pechkani benzin solingan besh litrli idish yordamida yoqmoqchi bo‘lgan, biroq olov uning o‘ziga ham sachragan, shundan so‘ng askar idishni kazarma tomon uloqtirgan.
“Katta ehtimol bilan, bu vaziyatda yong‘inga beixtiyor yo‘l qo‘yilgan. Shundan keyin nima bo‘lgani hammamizga ma’lum. Umid qilamanki, Bosh prokuratura va Tergov qo‘mitasi barcha holatlarni aniqlaydi”, — dedi Pashinyan.
Izoh (0)