Argentinaning Chako provinsiyasida besh nafar noma’lum shaxs Villa Angela aviaklubidan Cessna-206 yengil motorli samolyotini olib qochdi, ammo havoga ko‘tarilgandan keyin yonilg‘i ta’minotini ochishni unutib, darhol halokatga uchradi. Bu haqda hudud prokurori Serxio Rios jurnalistlarga ma’lum qildi.
“Agar uchoq shaharga qulaganida, fojia bo‘lardi. Samolyotda yashirin blokirovka tizimi mavjud. Ular havoga ko‘tarilgan paytda bu kranni ochishni unutgan va benzin tugab qolgan. Yonilg‘i liniyasi qayerda ekanini hamma ham bilmaydi”, — deya tushuntirdi Serxio.
Prokurorning so‘zlariga ko‘ra, halokatga uchragan samolyotning narxi soliqlarni hisobga olgan holda 1,5 million dollardan sal ko‘proqni tashkil etadi va uni ishlab chiqarish eksklyuziv hisoblanadi. Ma’lum qilinishicha, samolyot egasi — fermer Rojer Martin.
Hodisa shahardan 5 km uzoqlikda sodir bo‘lgan, deb yozadi Diario Norte. Unga ko‘ra, samolyot bo‘laklari uchish-qo‘nish yo‘lagidan 7 km uzoqlikda topilgan.
Ular bilan birga samolyot o‘g‘rilarining jasadlari qoldiqlari topilgan, ammo Pagina/12 nashri tergovga yaqin manbalariga tayanib xabar berishicha, faqat bir kishining jasadi aniqlangan. Vayronalar orasidan 9 mm kalibrli to‘pponcha, sun’iy yo‘ldosh telefoni, Paragvay valyuta kupyuralari va Cerro Porteño klubining kepkasi ham topilgan. Shundan kelib chiqib qurbonlar Paragvaydan ekaniga ishonilmoqda.
Serxio Riosning aniqlik kiritishicha, jinoyatchilar angarga ombir yordamida kirgan. Ularning bir qator “juda murakkab” signallarni chetlab o‘tish qobiliyati, shuningdek, sun’iy yo‘ldosh telefoni borligi samolyotni o‘g‘irlaganlar narkotik kartel a’zolari ekanidan dalolat beradi, deydi prokuror. Tergovchilar ularning shaxsini videokuzatuv kameralari orqali aniqlashga urinmoqda.
Izoh (0)