Арманистондаги ҳарбий қисмда 15 кишининг ҳаётига зомин бўлган ёнғин хавфсизлик қоидаларининг бузилиши туфайли юзага келган. Арманистон мудофаа вазири Сурен Папикян ҳукумат йиғилишида ҳодисанинг сабабини шундай тавсифлади.
«Ҳарбий полициянинг дастлабки маълумотларига кўра, ёнғин ҳарбий хизматчиларнинг тақиқланган модда — бензинни қўллаши оқибатида содир бўлган», — деди вазир.
Арманистон Тергов қўмитаси раҳбари Аргишти Кярамяннинг айтишича, икки ёки ундан ортиқ одам ўлимига сабаб бўлган хавфли материаллар билан ишлаш қоидаларининг бузилиши моддаси билан жиноий иш қўзғатилган. «Ёнғин бинони иситиш вақтида хавфсизлик қоидаларининг бузилиши ортидан содир бўлган, деган дастлабки версия мавжуд», — қўшимча қилди қўмита раҳбари.
Ўз навбатида Арманистон бош вазири Никол Пашинян 2022 йил декабрь ойида республика Қуролли кучлари Бош штаби бошлиғи Эдвард Асрян печкаларни ёқиш учун бензин ва бошқа тез ёнувчи суюқликлардан фойдаланишни тақиқлаганини айтди. Ҳукумат раҳбарининг таъкидлашича, дастлабки маълумотларга кўра, офицер казармадаги печкани бензин солинган беш литрли идиш ёрдамида ёқмоқчи бўлган, бироқ олов унинг ўзига ҳам сачраган, шундан сўнг аскар идишни казарма томон улоқтирган.
«Катта эҳтимол билан, бу вазиятда ёнғинга беихтиёр йўл қўйилган. Шундан кейин нима бўлгани ҳаммамизга маълум. Умид қиламанки, Бош прокуратура ва Тергов қўмитаси барча ҳолатларни аниқлайди», — деди Пашинян.
Изоҳ (0)