Rossiya prezidenti Vladimir Putinga nisbatan ishonchsizlik u bilan ehtimoliy tinchlik muzokaralari, yarashuv rejalari va kelishuvlar haqidagi har qanday muhokamalarni tugatishga sabab bo‘ldi, dedi Britaniya sobiq bosh vaziri Boris Jonson “Yevropeyskaya Pravda” nashriga bergan intervyusida.
“Putinga ishonish kerak emasligi shunchalik aniq-ravshanki, shu sababli ham u bilan hech narsa haqida kelishib ololmaysiz… Shu sababli ham u bilan kelishuvga erishish g‘oyasi ish bermadi. Va har safar barchamiz yagona mantiqiy xulosaga qaytishga majbur bo‘lardik, bu ham bo‘lsa, Ukrainani qo‘limizdan kelganicha qo‘llab-quvvatlashimiz kerakligidir”, — deya tushuntirdi u.
Rossiya qo‘shinlarining Ukrainaga kiritilishidan oldin ba’zi G‘arb mamlakatlari hukumatlari Kiyevning turib berish imkoniyatlariga shubha bilan qaragandi, biroq vaqt o‘tishi bilan ular buning teskarisiga ishonch hosil qildi, dedi Jonson. Buyuk Britaniya, dedi u, darhol Rossiyaning harbiy mag‘lubiyatiga erishishga qaror qildi, ammo Germaniya va Fransiya dastlab murosaga kelish yo‘llarini qidirishni va muzokaralarni boshlashni yoqlab chiqdi.
Qirollik sobiq bosh vaziri so‘zlariga ko‘ra, G‘arb yetakchilarining ba’zilari “Putin mag‘lub bo‘lishi haqida gapirish” haddan tashqari deb hisoblab, buning uchun boshqa so‘zlarni topishga chaqirgan. Jonson ta’kidlashicha, ularni o‘z pozitsiyasiga ko‘ndirishga uringan va minimal maqsad sifatida Rossiya qo‘shinlarining 2022-yil 24-fevralgacha bo‘lgan pozitsiyalarga chekinishiga erishishga chaqirgan. G‘arb yetakchilarini ko‘ndirishga “Ukraina harbiy muvaffaqiyatining muqobili yo‘q” degan argument qo‘l keldi, dedi u.
Fransiya prezidenti Emmanuel Makron va Germaniya kansleri Olaf Shols Rossiya qo‘shinlarining Ukrainaga kiritilishiga qadar Putin bilan bir necha marta muloqot qilib, bunday ssenariydan voz kechishga chaqirgan, shu maqsad bilan ular 2022-yil boshida Moskvaga kelgandi.
Putin ham G‘arb yetakchilariga nisbatan ishonchsizlik bildirgandi. Bir yil avval, maxsus operatsiya haqida e’lon qilinishiga qadar, u NATOni sharqqa tomon kengashtirmaslikka va’da berishib, Moskvani “dog‘da qoldirib ketishgani”ni aytgandi. “Biz uzoq vaqt chidadik, kelishuvga erishishga harakat qildik. Endi aniqlanishicha, bizni burnimizdan sudrab, aldab yurishgan. Bu biz bilan birinchi marta sodir bo‘layotgani yo‘q”, — dedi u.
Izoh (0)