Afg‘onistonning Tabiiy ofatlar oqibatlarini bartaraf etish vazirligi ma’lumotlariga ko‘ra, mamlakatda qattiq sovuq va qor yog‘ishi oqibatida halok bo‘lganlar soni 70 kishiga yetdi.
“Dastlabki ma’lumotlarga ko‘ra, qor yog‘ishi va sovuq havo tufayli Bodg‘is, G‘azni, Nimruz, G‘or, Paktika, Hirot, Qandahor va Faryob, Sari-Pul Juzjon viloyatlarida 70 kishi halok bo‘lgan, shuningdek, Bodg‘is, Sari-Pul, Juzjon va Faryobda kamida 70 ming bosh qoramol nobud bo‘lgan”, — dedi vazirlikning favqulodda vaziyatlar bo‘yicha tezkor markazi rahbari mulla Abdulla Muhammadiy.
Afg‘oniston aholisi bu qishda misli ko‘rilmagan sovuq bo‘layotganini aytmoqda. Ularning fikricha, sovuq mavsumda qurbonlar sonining ko‘payishiga sabab — qashshoqlik va ishsizlik.
“Biz xalqaro hamjamiyat, mahalliy ma’muriyat va hamkor tashkilotlardan mahalliy aholiga yordam berishlarini so‘raymiz. Havo ancha sovuq, odamlarning iqtisodiy ahvoli juda og‘ir”, — deydi Bomiyon viloyatida yashovchi Muhammad-Amin Xaliliy TOLOnews telekanaliga bergan intervyusida.
Telekanalning boshqa suhbatdoshlari esa muhtoj oilalarga gumanitar yordam tarqatishni zudlik bilan tiklash zarur, deb hisoblamoqda.
Tabiiy ofat oqibatlarini bartaraf etish vazirligi vakillarining ta’kidlashicha, oxirgi 28 kun ichida mamlakatning turli hududlaridagi sovuq to‘lqindan jabr ko‘rgan 5 mingga yaqin oilaga oziq-ovqat va nooziq-ovqat yordam to‘plamlari tarqatilgan.
Izoh (0)