AQSH pozitsiyasini yumshatmoqda: Vashington Kiyevga Qrimga zarba berishda yordamlashishi mumkin

AQSH Ukrainani Qrimdagi nishonlarga zarba berish imkoniga ega vositalar bilan ta’minlash masalasi bo‘yicha o‘z pozitsiyasini asta-sekin yumshatmoqda, deb yozadi The New York Times.

Yarimorol Rossiya tomonidan anneksiya qilinganidan beri AQSH Qrimni Ukraina hududi deb ta’kidlaydi. Biroq urush boshlanganidan keyin Qo‘shma Shtatlar Kiyevga yarimoroldagi nishonlarga zarba berish vositalarini jo‘natishdan bosh tortdi. NYT yozishicha, harbiylar va AQSH prezidenti ma’muriyatining amaldorlari shaxsiy suhbatlarda Ukraina Qurolli kuchlarining Qrimga zarba berishi maqsadga muvofiq emasligini ta’kidlab, frontning boshqa qismlaridagi nishonlarga e’tibor qaratish zarur deb hisoblagan.

Endi bo‘lsa munosabat o‘zgargan, deb yozadi NYT. Bayden ma’muriyati agar Ukraina kuchlari Rossiyani Qrim ustidan nazoratni qo‘ldan chiqarish bo‘yicha tashvishga tushira olsa, bu kelajakdagi har qanday muzokaralarda Kiyev pozitsiyasini mustahkamlaydi, degan fikrga kelmoqda. AQSH rasmiylari va ekspertlari orasida Rossiyaning taktik yadro qurollarini qo‘llashi haqidagi xavotirlar ham pasaygan, ammo ularning fikricha, bunday ssenariy xavfi baribir saqlanib qolmoqda.

Maqolada ta’kidlanishicha, Ukrainani Qrimdagi nishonlarga zarba berishga qodir masofada uchadigan raketalar bilan ta’minlash haqida haliyam gap yo‘q. Ammo Qrim ko‘prigi singari, yarimorolning asosiy ta’minot yo‘llariga hujum qilish uchun HIMARS yoppasiga o‘t ochish tizimlari va Bradley zirhli mashinalaridan foydalanish imkoniyati muhokama qilinmoqda.

8-oktabr kuni yarim orolni Rossiyaning Krasnodar o‘lkasi bilan bog‘lovchi Qrim ko‘prigida portlash sodir bo‘lgandi. Ko‘prikning avtomobil qismida bir necha oraliqlar vayron bo‘lgan. Rossiya tomoni voqeada Ukraina maxsus xizmatlarini aybladi, Kiyev Qrim ko‘prigidagi portlashga aloqadorligini rasman tan olmadi.

Ukraina hukumati Qrimni qaytarish ularning maqsadi ekanini bir necha bor ta’kidlagan. Rossiya rasmiylari, o‘z navbatida, yarim orolga hujumlarning oldini olish uchun qo‘lida mavjud barcha vositalarni ishga solishga tayyorligini ma’lum qilgan.