Ukrainaning Rossiya bilan ziddiyatda mag‘lubiyatga uchrashi global oqibatlarga olib kelishi mumkin, shu jumladan G‘arb alyanslari mustahkamligiga ham ta’sir o‘tkazishi mumkin. Bu haqda AQSH Milliy razvedkasi direktori Evril Xeyns Davosdagi forumda so‘zlagan nutqida aytib o‘tdi.
“Ukraina muvaffaqiyat qozonmagan taqdirda, bu dunyo uchun qanday oqibatlarga olib kelishi borasida aytilgan barcha narsalarga qo‘shimcha ravishda yana bir qator mulohazalar bor: Ukrainadagi nizo global oqibatlarga egaligi haqidagi fakt aniq-ravshandir”, — dedi u.
Xeynsning so‘zlariga ko‘ra, Ukraina mag‘lub bo‘lgan taqdrida, G‘arb iqtisodiy oqibatlarga va mavjud alyanslarning mustahkamligi borasidagi savollarga to‘qnash keladi. “Kelajakda amaldagi shaxslarning qonun ustuvorligini, BMT ustavini va biz o‘rnatgan tartibni buzishi bilan bog‘liq vaziyatlarni qanday hal qilamiz — shu masala ham qarshimizga chiqadi”, — dedi Xeyns va Ukrainani “maksimal darajada kuchli” qo‘llab-quvvatlashga chaqirdi.
Avvalroq Ukrainadagi nizo Rossiya mag‘lubiyati bilangina tugashi haqida Germaniya kansleri Olaf Shols aytib o‘tgandi. “Urush tugashi uchun Rossiya yutqazishi kerak. Mana shuning uchun ham sheriklar bilan maslahatlashuvlar o‘tkazgan holda Ukrainaga doimiy ravishda ko‘p qurol-yarog‘ yetkazib beryapmiz”, — dedi u.
18-yanvar kuni Rossiya prezidenti Vladimir Putin Ukrainadagi maxsus operatsiyada Rossiya g‘alaba qozonishi muqarrar ekanini aytdi. U, shuningdek, Rossiya amalga oshirayotgan ishlar, shu jumladan, “maxsus operatsiya” ham, go‘yoki, urushga nuqta qo‘yishga urinish ekanini aytdi. “Bugungi kunda qilayotgan har bir ishimiz, shu jumladan, maxsus harbiy operatsiya urushni to‘xtatish va Donetsk hamda Lugansk hududlarida yashovchi xalqimizni himoya qilishga urinishdir. Bu bizning tarixiy hududlarimizdir”, — dedi u.
Mavzuga doir:
Izoh (0)