Yangi Zelandiya bosh vaziri Jasinda Ardern besh yillik faoliyatidan keyin o‘z lavozimini tark etishga qaror qildi, deb yozadi Deutsche Welle.
Yangi Zelandiya hukumati rahbari 2023-yil 7-fevral kuni iste’foga chiqmoqchi. Uning so‘zlariga ko‘ra, bu lavozimga qayta saylanish niyati yo‘q. Ta’kidlanishicha, Ardern televideniye orqali namoyish etilgan matbuot anjumanida bayonot berayotgan vaqtida xafa holatda bo‘lgan.
Watch: New Zealand Prime Minister Jacinda Ardern announces resignation.
— The Canadian Independent (@canindependent) January 19, 2023
Ardern will not seek re-election and plans to step down before Feb. 7. pic.twitter.com/NDPj0w8tSk
“Men uchun vaqt keldi. Yana to‘rt yilga kuchim yetmaydi. Bu hayotimdagi eng mazmunli besh yarim yil bo‘ldi. Ketishimga sabab shuki, bunday o‘ziga xos ish katta mas’uliyatni yuklaydi. Bu shunday mas’uliyatki, yetakchi roliga ayni paytda munosibmisan, yo‘qmi — bilib turishing kerak”, — dedi u o‘zining Leyboristlar partiyasi a’zolariga qarata, shu bilan u o‘z iste’fosi ortida hech qanday yashirin mojaro yo‘qligini bildirdi.
Bosh vazir, shuningdek, 14-oktabr kuni umumiy saylovlar bo‘lib o‘tishini e’lon qildi.
“Saylovlarda ishtirok etmasam-da, aniq bilaman, yangi zelandiyaliklarni eng ko‘p tashvishlantiradigan masalalar shu yil mobaynida va saylovlarga qadar diqqat markazida bo‘lib qoladi”, — dedi Ardern.
Ardern 2017-yilda 37 yoshida hukumat rahbari etib saylangan edi — u dunyodagi eng yosh ayol rahbarlardan biri hisoblanadi. Shuningdek, u o‘z lavozimida ishlayotib farzandli bo‘lgan kamdan-kam yuqori mansabdorlardan ham biridir.
Ardern uch yil davom etgan koronavirus pandemiyasi chog‘ida Yangi Zelandiyani boshqargan bo‘lib, uning inqirozni yengib o‘tish bo‘yicha xatti-harakatlari xalqaro hamjamiyat maqtoviga sazovor bo‘ldi.
Izoh (0)