“Urush zudlik bilan tugashi kerak”: Yevroparlament rahbari Ukrainani ko‘proq qurol-yarog‘ bilan ta’minlashga chaqirdi

Yevroparlament rahbari Roberta Metsola Rossiyaning “agressiv” urushiga qarshi Ukrainaga qo‘shimcha moliyaviy va harbiy yordam ko‘rsatishga chaqirdi. Bu haqda Spiegel xabar berdi.

“Bu urush zudlik bilan to‘xtatilishi kerak. Ukraina esa urushda g‘alaba qozonishi zarur”, — dedi u.

Uning tushuntirishicha, “Ukraina uchun ko‘proq qurol, moliyaviy va gumanitar yordam, amaliy birdamlik hamda Rossiyaga qarshi ko‘proq sanksiyalar” joriy etish kerak. Mezola, urush boshlanganidan beri Yevropa Ittifoqi Ukrainaga ko‘rsatayotgan yordamidan faxrlanishini aytdi. Biroq Ittifoq ko‘proq narsani qila olishini bildirib, Rossiyaga qarshi yaqinda qabul qilingan sanksiyalarni olqishladi.

16-dekabr kuni Yevropa Ittifoqi Rossiyaga qarshi to‘qqizinchi sanksiyalar paketini qabul qildi, uning doirasida rossiyalik siyosatchilar va ularning oila a‘zolariga nisbatan iqtisodiy cheklovlar joriy etildi. Yevroittifoqi Rossiyaning barcha parlament partiyalariga, Harbiy-dengiz floti, Aerokosmik va quruqlikdagi kuchlariga va “Roskomnadzor”ga qarshi sanksiyalar kiritgan.

15-dekabr kuni Yevroparlament 1932–1933-yillardagi Golodomorni Ukraina xalqining genotsidi deb tan oldi. Parlamentning 507 nafar deputati tegishli rezolyutsiya uchun ovoz bergan, 12 nafari esa qarshi chiqqan. Xuddi shunday qaror allaqachon bir qator davlatlar tomonidan qabul qilingan. 30-noyabr kuni Germaniya Bundestagi tegishli rezolyutsiya uchun ovoz bergan.

Irlandiya, Ruminiya, Moldova, Chexiya va Germaniya parlamentlari Golodomorni Ukraina xalqining genotsidi sifatida tan olgan. AQSH Senati 2018-yilda Ukrainadagi Golodomorni ham genotsid sifatida tan oladigan rezolyutsiyani qo‘llab-quvvatlagan.

Mavzuga doir:

• Yevroparlament Rossiyani “terrorizm homiysi” deb tan olish to‘g‘risidagi rezolyutsiyani qabul qildi
• Kreml Yevroparlament Rossiyani “terrorizm homiysi” deb e’lon qilganiga munosabat bildirdi