O‘tgan yili 148 ta mamlakatda oziq-ovqat, yonilg‘i narxining oshishi va yashashning qimmatlashishi bilan bog‘liq 12,5 mingta norozilik aksiyalari bo‘lib o‘tdi, ularning eng yiriklari G‘arbiy Yevropada kuzatildi, deb yozadi Politico Vashingtondagi Amerika universitetiga tayanib.
“Dunyoda shu paytgacha, asosan energetik sabablarga ko‘ra, hayotning qimmatlashuviga qarshi bir yil ichidagi bunchalik ko‘p namoyishlar hali hech qachon qayd etilmagan edi”, — dedi universitetning rivojlanish siyosati bo‘yicha mutaxassisis Naomi Husayn. Uning aytishicha, ilgari noroziliklarning “o‘chog‘i” oziq-ovqat bo‘lgan bo‘lsa, endi energiya ulkan ahamiyat kasb etmoqda.
Yevropada yonilg‘i narxi qish faslidagi anomal issiq ob-havo tufayli pasaygan bo‘lsa-da, hukumatlar qiyin vaziyatdan chiqib keta olmadi, deya qo‘shimcha qildi tadqiqot mualliflaridan biri Jeffri Xallok. Uning aytishicha, umumiy maqsadlardan tashqari, namoyishchilarni “hukumatga qarshi kayfiyat” ham birlashtirib turibdi.
Politico yozishicha, oziq-ovqat va energiya yetishmovchiligi eng ko‘p Global janubga (ya’ni iqtisodiy jihatdan kamroq rivojlangan mamlakatlarga) zarba bergan, biroq Shimoliy yarim shardagi boyroq mamlakatlarda tobora ko‘proq norozilik aksiyalari yuz bermoqda.
Xususan, gazeta eslatishicha, sentabrda Rim, Neapol va Milanda namoyishlar bo‘lib o‘tgan, ularda Italiya aholisi elektr energiyasi bo‘yicha kelgan hisoblarini yoqib yuborgan edi. Oktabrda esa Fransiyadagi namoyishchilar hukumatdan yashash narxining balandligi yuzasidan choralar ko‘rishni talab qildi, noyabrda Ispaniyada ishchilar maoshlarni oshirishni talab qilib chiqdi.
Bundan tashqari, o‘tgan yil kuzida Chexiyada ham bir necha marta noroziliklar bo‘lib o‘tdi, namoyishchilar gaz narxini pasaytirishni so‘radi.
Izoh (0)