Ukrainadagi harbiy nizo istalgan vaqtda tugashi mumkin, ammo buning uchun Ukraina rahbariyati irodasi kerak, dedi Rossiya prezidenti matbuot kotibi Dmitriy Peskov.
“Hozirgi holatda bularning barchasi qachon tugashi haqida uzundan-uzoq mulohaza qilish mumkin. Zelenskiy bu qachon yakunlanishini biladi. Agar xohish bo‘lsa, bularning barchasi ertagayoq tugashi mumkin”, — dedi Peskov.
Shu tariqa Peskov Vladimir Zelenskiyning Politico nashriga qaratilgan videomurojaatidagi gaplariga izoh berdi, u Ukrainadagi nizo 2023-yilga kelib yakunlanishi mumkinligini taxmin qilgandi. Zelenskiy Yevropaning shu yilgi eng ta’siri kuchli shaxslari reytingida yetakchilik qilganidan keyin, u: “Ishonamanki, ukrainaliklar kelasi yilda ham eng ta’siri kuchli bo‘ladi, lekin u paytda allaqachon tinch zamon kelgan bo‘ladi”, — dedi.
Ukraina va G‘arb mamlakatlari nizo yakunlanishining asosiy sharti barcha egallangan hududlardan Rossiya qo‘shinlarining to‘liq olib ketilishi ekanini ko‘p marta aytgan. Zelenskiy muzokaralar boshlash uchun Ukraina Rossiyadan “hududiy yaxlitligining qayta tiklanishini, BMT Ustaviga nisbatan hurmatni, urush oqibatida yetgan barcha zararning qoplanishini, har bitta harbiy jinoyatchining jazolanishini va bularning barchasi takrorlanmasligi kafolatlanishini” kutishini aytgandi.
Izoh (0)