Ukrainadagi nizo Rossiya mag‘lubiyatga uchragan taqdirda tugaydi, dedi Germaniya kansleri Olaf Shols Davosdagi Jahon iqtisodiyot forumida nutq so‘zlayotib.

“Urush tugashi uchun Rossiya yutqazishi kerak. Mana shuning uchun ham sheriklar bilan maslahatlashuvlar o‘tkazgan holda Ukrainaga doimiy ravishda ko‘p qurol-yarog‘ yetkazib beryapmiz”, — dedi u.

Kansler Rossiyaning Ukrainada g‘alaba qozonishiga yo‘l qo‘ymaslik kerakligi haqida avval ham aytib o‘tgandi. “Rossiya bu urushda yutib chiqmasligi kerak. Xalqaro huquqning qo‘li baland kelishi kerak”, — degan edi u 2022-yil aprelida. Chegaralarning butunligi va davlat hududining yaxlitligi Yevropa xavfsizligining asosiy tamoyillari bo‘lib qolmoqda, degan edi kansler Moskva tomonidan “tiqishtirilayotgan” yarashuvni nomaqbul deb atab.

Shu bilan birga, Germaniya hukumati rahbari Rossiya va NATOning to‘qnashuviga yo‘l qo‘ymaslikka chaqirgandi. Dekabrda kansler Moskva va G‘arb o‘rtasida Ukraina bo‘yicha ziddiyatlar bo‘lsa-da, Rossiya bilan muzokaralar bo‘yicha imkoniyatni yo‘qqa chiqarmaslikni yoqlab chiqqandi.

18-yanvar kuni Rossiya prezidenti Vladimir Putin Ukrainadagi maxsus operatsiyada Rossiya g‘alaba qozonishi muqarrar ekanini aytdi. Peskov Ukrainaga qurol-yarog‘ yetkazib berilishi nizoni diplomatik yo‘l bilan tartibga solishda yordam bermasligini, ammo maxsus operatsiya maqsadlariga erishishda ham xalal bermasligini aytgandi.